Ronald Geerman ta verpleegkundig na Departamento di Malesanan Contagioso. Departamento di Salud Publico tin algun aña caba ta monitor e situacion cu e vacunamento contra e virus di influenza. Ta berdad cu locual cu e cantidad cu ta vacuna, no ta e cantidad desea. Pa e motibo ey a dicidi di bin cu un otro tipo di strategia. Normalmente dokternan ta prescribi e receta y e pashent ta bay na e departamento pa e wordo aplica. A kere cu kisas esey ta un motibo cu hopi pashent no ta presenta na DBZ. Pa e motibo ey e aña aki a scoge un otro sistema, loke ta yama un Outreach Program, cu a traha un schema cu diferente luga, cu orario cu ta bay na e luganan pa aplica e vacuna na e gruponan di riesgo.
Con a bin na e luganan aki
Segun Geerman, no ta zomaar a kies cierto luganan pa bay un of dos dia. A uza informacion cu a haya di CBS. A wak e luganan con e poblacion ta. Tambe a haya informacion con concentra e personanan cu ta riba 60 aña, con e ta parti na Aruba y uzando tur e informacion ey, a traha un schema, pinpoint cierto luganan strategicamente scogi, teniendo cuenta cu ubicacion, cu e luga ta conoci den comunidad y tambe loke e luga por facilita manera parkeo, etc.
A tuma algun tempo, pasa door di dje, pidi permiso na e hendenan, splica nan e importancia di con ta uza e luganan aki y tin cu bisa cu a haya cooperacion 100% di e luga y personanan cu a acerca, pa haci uzo di e facilidad.
Tambe pa facilita e dokternan, coleganan di voorlichting a concipia un receta cu riba dje tin amplia e gruponan di riesgo riba dje y ora e dokter duna e pashent e recept, ya caba e pashent ta wak patras unda y ki ora e por acudi pa su vacuna. Si por ehempel un persona di San Nicolas, tal dia e ta na Noord y tin su receta, e por acudi libremente na Noord unda e vacuna ta wordo suministra.
DBZ tambe ta keda habri henter dia, durante oranan di oficina, cu e persona por acudi pa su vacuna. Tambe pa e personanan cu no ta cay den grupo di riesgo, semper tambe e vacuna ta disponibel pa nan pa un prijs relativamente barata cu ta 15 florin, Geerman a splica.