Director di Cuerpo di Douane, Sr. Ricky Croes, ta tilda sindicato SADA di saca informacion secreto di Douane den publicidad, den e caso aki over di e containerscan cu pa basta tempo caba no ta funcionando. Si esaki e director ta considera ‘informacion secreto di Douane’, e ora tin un problema hopi grandi. Sr. Eduard Maduro, lider di sindicato SADA ta elabora mas ariba e ponencia aki.
Tur hende cu ta subi waf di Barcadera, tur e trucknan cu ta bay saca container, sa cu e containerscan no ta funcionando. Esaki Sr. Maduro di SADA ta considera ‘muchachada’.E ta simplemente un persecucion di parti di director tras di e directiva of tras di Sr. Maduro personalmente. Esaki no ta tolerabel, segun Sr. Maduro.
Tambe pa loke ta trata Kustsurveillance, cu tambe lo ta wordo considera ‘secreto di compania’, cu no mag trece esaki den prensa. Director ta tilda Sr. Maduro, como douaneambtenaar, siendo lider di sindicato no ta descarta e cuestion di cu e tin cu atene su mes na regla di dienst. Como lider di sindicato, e tin derecho pa expresa y manifesta tur locual ta sosodiendo cu no ta agrado di miembronan, cu cosnan cu nan ta señala cu nan ta bayendo fout. Nan tin derecho di señala esakinan. Si nan no ta haya oido di director ni di minister, cual e ultimo a bisa di cu no ta sinta cu sindicato, ya cu segun e mandatario, sindicato a falt’e respet. No ta keda nan nada otro di bay den prensa.
E situacion na airport, ta e druppel cu a bay over, ya cu e situacion ta caotico. Sindicato a tuma nota cu e director a declara na prensa cu trahadonan na airport lo ta haciendo nan maximo esfuerso pa haci e trabao bon, cual sindicato SADA ta nenga categoricamente. Kisas e director no ta bayendo na pia di trabao na airport. Pasobra ta e trahadonan ta esunnan cu sa kico ta come y bebe riba e ‘werkvloer’. Tocante e luga di Douane, e director a admiti cu e ta chikito, cual ta e mesun director a duna Triple A lus berda pa trah’e. Kisas e director no ta corda, pero sindicato a protesta contra di esaki y toch el a bay di acuerdo pa trah’e.
Tur e puntonan positivo a trece dilanti, y ta paso cu ta sindicato a trece dilanti, e ta wordo hinca den lachi di olvido. E cuestion di rapport aki tabata e ‘tipping point’, pero loke ta e salaris mes, nan ta pendiente di esaki. Y cada bes sindicato ta wordo manda di cashi pa muraya. Bureau di Minister President a hinca hopi input, pero nada no a cambia.
A pidi Minister President un clarificacion, y nan ta wardando pa haya un audiencia cu DRH. Ta bira dimas cu cada biaha nan ta keda tranca, coleganan ta warda. E maneho tabata cla caba, cla pa ehecuta.