Diadomingo mainta e barco di carga CFS Paceno a yega Aruba y a mara na waf di Barcadera, riba e barco aki tabatin por lo menos 21 container di klapchi abordo. E personalnan di Astec a keda encarga pa baha tur e containernan aki na ora y a termina cu e trabou basta lihe.
Ta conoci cu casi tur aña den Maart pa April Departamentonan di Gobierno Cuerpo di Bombero y DOW encarga cu explosivo ta reuni cu importador y bendedornan di klapchi. A palabra cu manera cu e containernan yega Aruba den December tin cu regla e papelnan pa ta na ordo na douanne y regla cu e compania cu tin cu saca nan for di waf y keda transporta pa Wela tur a bay di acuerdo cu esaki.
Ta mustra cu cos a tranca dialuna mainta, ora cu personal di DOW y Brandweer tabata na waf Barcadera pa saca tur 21 container a haya sorpresa.
Un importador cu a regla tur su papelnan y haci e pagonan necesario na Douanne so por a saca su container cu un compania di truck y asina prome cu merdia e prome container di klapchi a sali bay wela.
Un compania cu a haya mayoria di e containernan pa saca for di un importador tin problema cu pago, esaki ta haci cu Douanne no por laga esaki sali asina sin haci e pagonan manera con ley ta permiti.
Maske cu ta container di klapchi tur hende tin cu cumpli. Pa e departamentonan encarga cu explosivo esaki no a cay den bon tera, ya cu e palabracion ta cu container di klapchi no por keda riba un waf mas cu 24 ora debi na seguridad di e luga y di hende y tin cu bay wela unda cu si e luga ta sigur.