Diahuebs ultimo, e torneo Copa Roy Croes a cuminsa na Compleho Deportivo Yara. E torneo ta di diahuebs 5 di September pa 8 di September cu diferente clubnan participando, cu bar y cushina bon surti y musica di El Patron.
E torneo aki ta na honor di e fundador, presidente, trainer, coach y tata di nos presidente actual di S.V. Unistars. Señor Roy Croes, den Feliz memoria, ta hopi conoci den e bario di Pos Chikito y Savaneta. 36 aña pasa, el a funda S.V. Unistars pa asina tene e muchanan di bario for di caya. Su lema tabata tambe: “Un futbolista mas ta un delincuente menos”. Desde e momento cu a funda S.V. Unistars e ekipo di futbol a conoce diferente categoria di edad manera mini Baby, Baby, LIFIDA A y Menor, Mayor, Division 1 & 2. Den e campeonato ultimo Unistars a promove pa Division di Honor.
E clubnan participante ta Atlantico, Sporting, Sportboys, RCA, Caiquetio, Britania Damas, Estrella Damas, La Fama, Brazil Jrs, Riverplate, RCS y Unistars, Dakota, San Luis, Nacional, Master Boys. E final ta tuma lugar diadomingo parti mainta y atardi den e categorianan U9, U11, U17, Division Uno y Division di Honor.
Diasabra anochi tin un derby special entre Unistars ‘bieuw’ y Unistars ‘nobo’.
S.V. Unistars ta invita henter pueblo di Aruba pa atende e torneo aki pa asina brinda un homenahe na un Buluarte importante den e mundo di futbol na Aruba.
Y tambe nos kier invita e hobennan di Pos Chikito y vecindario pa join nos club: Un club, un bario.
