WASHINGTON D.C./MOSCU – Esaki no ta un Guera Friu. E ta un conflicto abierto.
E relacion entre Merca y Rusia a deteriora drasticamente mey mey di un aluvion di acusacion y desacuerdo, cu ta bay desde operacionnan militar na Siria, e disputanan riba e Independencia di Oost Europa y e violacionnan cibernetico escala.
“Esaki ta un conflicto, no mester tin ningun duda,” Matthew Rojansky, director di e Instituto Kennan den Wilson Center a bisa riba e confrontacion entre Merca y Rusia.
Diamars, e secretario di prensa di Cas Blanco, Josh Earnest, a bisa cu Merca ta considerando un “gama” di respuesta “proporcional” na e supuesto hackeo Ruso di gruponan politico Mericano.
Washington a acusa Kremlin directamente di e atakenan cibernetico den e sistemanan electoral diabierna ultimo.
E acusacion a tuma luga despues cu e conversacionnan riba un “alto al fuego” na Siria a kibra y cu e funcionarionan Mericano a sugeri cu Rusia wordo investiga pa crimennan di guera den e ciudad di Aleppo.
Moscu a nenga rotundamente cu e ta entremete den e eleccion presidencial di Merca. Den un entrevista cu Christiane Amanpoure di CNN, e canciyer Ruso, Sergei Lavrov, a bisa cu esaki tabata un acusacion sin fundamento.
“Ta halagador, por supuesto, obtene e tipo di atencion aki pa un potencia regional, manera presidente Obama a yama nos algun tempo pasa… Nos no a mira un solo hecho, un solo prueba,” Lavrov a bisa.
E candidato presidencial democrata Hillary Clinton a señala e hackeonan di su campaña como prueba cu Rusia ta apoya su oponente Republicano, Donald Trump. Den un forum di inversion na Moscu diaranson, e presidente Ruso, Vladimir Putin, a rechas’e.
“Tabata tin full un histeria riba ta di interes pa Rusia, pero no tin nada den e interes di Rusia,” Putin a bisa.
“Full e histeria tin como obhetivo pa Merca lubida di e manipulacion di e opinion publico,” el a añadi. “Ningun hende ta papiando di esaki, tur hende kier sa ken a haci esey, lo importante ta loke ta paden y di loke e informacion ta trata.”
Mientras tanto, Moscu a laga abruptamente un pacto di siguridad nuclear, citando un agresion di Merca. Su responsabelnan a plantea abiertamente e posibel uzo di armanan nuclear.
E friccion entre Moscu y Washington, segun hopi analisis, e mayor desde e caida di e muraya di Berlin, a hiba Gorbachov, e ultimo lider di Union Sovietica, pa haci un yamado dialuna pa dialogo y distension.
“Mi ta kere cu mundo a yega na un punto peligroso,” Gorbachov a adverti, segun Agencia France Presse.
“Esaki tin cu para. Nos tin mester di renoba e dialogo,” Gorbachov a bisa, ora cu el a comenta riba e decision di Merca di suspende e conversacionnan riba Siria.
“Di hecho, esaki no ta un Guera Friu,” Igor Zevelev, exdirector di e oficina na Rusia di e Fundacion McArthur. “E ta un situacion hopi mas peligroso y impredicibel.”
Ta poco probabel cu e tensionnan ta mengua den corto placo, cu e posibilidad hopi real di desaroya un “wowo pa wowo” dinamico den un momento caminda cu canalnan di comunicacion entre e dos capitalnan a reduci.
Un diplomatico occidental a bisa cu e enfrentamentonan anterior entre West y Rusia a sigui un patron tipico di un escalada lento y un entendimento mutuo di ambos parti ora a yega e momento di para.
Cu e accionnan di Rusia na Siria, su decision di pone misilnan cu capacidad nuclear na portanan di NATO y su atakenan cibernetico, e diplomatico a bisa, “bo tin e impresion cu e lo bay den extremo.”
“Esaki no ta e ekilibrio strategico cu nos a conoce. E ta inusual y peligroso,” el a agrega.
E incidentenan reciente ta inclui e acoso di diplomaticonan Mericano na Moscu y e denuncianan Ruso cu nan funcionarionan di servicio exterior ta agobia na Merca, varios ocasion den e ultimo añ caminda cu avionnan di combate y barconan di guera Ruso a pasa cerca di barconan Mericano y e violacion di parti di Moscu na 2014 den un tratado di siguridad pa e prueba di misil di crucero lansa for di tera. E lista ta sigui.
E calidad di e relacionnan entre nos, ta sin duda e punto mas abao desde e Guera Friu,” e embahador di Rusia na Merca, Sergey Kislyak, a bisa. “E riesgo di erornan di calculo a aumenta,” specialmente cu e forsanan di NATO “siendo desplega na banda di nos fronteranan,” Kislyak a bisa den un discurso na e Universidad Johns Hopkins School of Advanced International Studies.
E embahador a bisa cu “e canalnan normal di comunicacion ta gevriez” entre Merca y Rusia. “Nos ta mira Merca tumando medidanan hostil contra Rusia, incluyendo e sancionnan, tin yamado pa aisla Rusia,” el a bisa.
Lavrov a bisa na e entrevistadornan di Canal Uno di Rusia cu Moscu a retira e pacto di siguridad nuclear di plutonium, dia 3 di October, debi na e “tendencianan agresivo anti-Rusia na e base di politica di Merca.”
El a referi na e despliegenan di NATO di infrastructura y misil como ehempel di “medidanan agresivo cu por afecta nos siguridad nacional.”
Riba luz di e tensionnan, Gorbachov a insisti na un “retorno na prioridadnan principal” entre Rusia y Merca.
“Esakinan ta e desarme nuclear, lucha contra terorismo, prevencion di un desaster ambiental,” el a numbera.
Sin embargo, cambia a corto plazo ta poco probabel. Putin a consolida su control riba Parlamento y parce cu e lo bay wordo reeligi den e proximo 18 lunanan.
E tin un trayectoria espinoso cu Clinton, kende el a acusa di instiga na December di 2011, manifestacionnan contra dje mientras cu e tabata secretaria di Estado.
Di su banda, Trump a elogia Putin repetidamente, restando importancia na e accionnan Ruso na Siria y pa presunto atakenan cibernetico.
“Mi ta kere cu lo ta bon pa nos bay bon cu Rusia,” Trump a bisa den un di dos debate presidencial diadomingo ultimo.
Independientemente di ken habita proximamente Cas Blanco, Putin no ta susceptibel di altera e curso di cosnan. E alineacion di Rusia cu Siria y e lucha contra Merca den e Conseho di Siguridad di Nacionnan Uni, ta sirbi e lider Ruso na cas.
“Por pensa “dicon ta preocupa?”, pero claramente tin preocupacion den algun nivel” banda di Putin riba e proximo eleccionnan presidencial “y esey lo apunta su popularidad”, Angela Stent, directora di e Centro di Estudio di Eurasia, Rusia y Oost Europa na e Universidad di Georgetown, a bisa.
Tambe ta distrae e Rusonan di economia, cu segun e Grupo Eurasia, entre otro analistanan, tin un perspectiva negativo a largo plazo.
“Ta util tin un enemigo si personanan ta sintiendo e impacto economico,” Stent a bisa.
Tin elementonan global den e strategia di e lider Ruso cu tambe ta un señal di e tensionnan continuo. Putin ta “impulsa pa ideanan grandi riba e papel di Rusia na mundo,” Zevelev a bisa. E kier limita e papel di liderasgo mundial di Merca, frenta loke e ta mira como un inclinacion Mericano pa “cambio di regimen” y demostra cu Rusia tambe por uza forsa militar pa alcansa obhetivonan di politica exterior.
“Putin kier haci Rusia bal como potencia global cu ambicionnan grandi,” Zevelev a bisa, “y cu e fin di demostra cu Moscu tin cu haci algo den e areana mundial de bes en cuando.”
“Esaki ta e momento mas peligroso desde ya mi no sa ki tempo,” Stens a bisa, di e Universidad di Georgetown, kende a añadi cu e proximo lunanan, prome cu e presidente di Merca asumi e cargo, e lo ta probablemente yena di acontecimento.
“Rusia ta compronde cu e tin algun luna te cu Januari y dicon e no ta tuma bentaha di esey,” el a bisa.
Fuente: CNN en Español