MOSCU, Rusia – E presidente Ruso, Vladimir Putin, a ordena awe pa revoca e firma di Rusia di e Statuto di Roma, e base legal cu a crea e Corte Penal Internacional (CPI), segun un documento publica pa e pagina oficial di Gobierno.
Putin a ordena “acepta e propuesta di Ministerio di Husticia, consensua cu e Ministerio di Exterior, e Tribunal Supremo, Fiscalia Generla y Comite di Instruccion (…) pa informa e secretario general di Nacionnan Uni riba e decision di Rusia di no forma parti di e Statuto di Roma di Corte Penal Internacional.”
“E decision di Rusia di no participa den e Statuto di CPI, of den otro palabra, di revoca e firma di e documento aki, ta implica consecuencianan huridico premira pa e Convencion di Viena riba e tratadonan internacional di 1969,” Ministerio di Asuntonan Exterior a precisa den un comunicado.
E resolucion – danki na cual Rusia ta keda pafo di e hurisdiccion di e Tribunal di Den Haag – ta drenta awe na vigor.
Canciyeria Ruso a destaca cu “den 14 aña di funcionamento, CPI a dicta solamente cuater sentencia y a gasta mas di 1000 miyon di dollar.”
Rusia a firma e Statuto di Roma na aña 2000 pero nunca a ratifik’e, manera e otro 123 estadonan a haci, cu excepcionnan notabel di Merca, China of Israel.
Cu su decision di revoca su firma di e documento, ningun ciudadano Ruso por wordo huzga na Den Haag pa crimennan di guera of genocidio, a menos cu tin un resolucion al respecto di e Conseho di Siguridad di Nacionnan Uni, caminda cu Rusia tin derecho na voto.
Futnete: RCN Noticias