MOSCU, Rusia – Rusia no tin intencion pa brinda ningun disculpa despues cu e rapport di e Joint Investigatino Team (JIT) a sali na cla riba e derivo di vuelo MH17. E minister di Asuntonan exterior Ruso, Sergej Lavrov a indica diabierna den un entrevista cu BBC cu no tin prueba pa e muestra di JIT cu e Boeing for di un area maneha pa rebeldenan pro Rusia, lo a tira e avion cu un proyectil Buk procedente di Rusia.
Ora cu e presentador a puntra Lavrov si Moscu ta dispuesto pa duna disculpa pa nan envolvimento den e tragedia, Lavrov a bisa: “Excusa? Pakico?” El a insisti cu hopi prueba ta basa riba imagennan riba social media y declaracionnan di testigonan anonimo.
E minister a mustra riba e investigacion penal ainda ta andando y cu no mester dicta sentencia te ora cu esaki keda conclui. Segun Lavror, Rusia a suministra un cantidad grandi di informacion na e investigadonan, pero nada te ainda no a wordo haci cu nan.
E team internacional di investigacion a papia diaranson ainda di “prueba palpabel” cu e raket a bin for di Rusia y cu a wordo tira for di un tereno na Pervomajski, un luga cu na e momentonan ey tabata den man di separatista pro-Ruso. Segun investigadornan tin un gran cantidad di material cu ta indica riba esaki, entre otro imagennan di radar, potretnan di satelite, declaracionnan di testigo, investigacion forensico y yamadanan getapt.
Fuente: RTL Nieuws