Nijmegen, Hulanda: Evanielle Rincones (17 aña) y Ry-Eza Rincones (14 aña) a participa den e musical West Side Story bou di encargo di Michelle Schmitz. Esaki ta un produccion cu nan scol, NSG Groenewoud, tin 3 aña ta trahando riba dje. Aña pasa e rumannan Rincones wordo aserca pa nan docentenan di musica, Gijs Verstegen y Ronald Pes, pa participa na e musical aki. Nan mester a haci un audition na unda e disiplina di canto, actuacion y baile a wordo evalua. Nan a pasa e audition aki exitosamente y nan tawata tin un aña di tempo pa prepara pa e musical West Side Story. Ry-Eza y Evanielle ta forma parti di e ensemble. Esaki ta nifica cu nan ta actua, baila y canta den e henter musical. E director musical y e director di baile, Ronald Pes y Nash Smith, a keda masha encanta cu e disciplina y talento di e rumannan Rincones. Pa Evanielle y Ry-Eza esaki tawata un experiencia inolvidabel y tawata masha orguyoso di por a hunga pa e Sharks (puertorriqueñonan). E musical a wordo presenta dos biaha pa dia, tres dia tras di otro, esta 8, 9 y 10 di december 2022, na unda tur dia e sala tawata yen. Sin duda algun e musical aki, cu a keda presenta pa alumnonan di NSG Groenewoud, ta un produccion grandi y di un nivel halto. Un pabien grandi ta bay na e hobennan aki y un biaha mas nos Arubianonan ta luci y ta halza nos bandera den exterior!