Mirando declaracion contradictorio di Ministerio Publico tocante minister Croes, laga mi conta un di mi tantisimo experencianan cu Ministerio Publico. Mi caso di ta sospechoso di a comete e delito di rebelion (opruiing) a bin abao ora un testigo clave a bisa huez cu e a wordo obliga pa firma contra mi. E ora PG himself a presenta den Corte pura pura y a purba di bully e testigo gritando e testigo cu e no por hala atras, e testigo a wak mi den mi wowonan y a bisa cu e no por gaña.
E ora Ministerio Publico a seponeer mi caso, teniendo cuenta cu interes general, cu segun huristanan ta straño. Ora mi a puntra algun aña despues na un otro PG kiko esey kiermen, el a bisa mi cu pa OM mi ta culpabel, mi a comete e delito, mi ta un delincuente. Ora mi a contest’e, dicon ex- lider di AVP, sentencia pa soborno y corupcion, a haya di Ministerio Publico, declaracion di buena conducta ( bewijs van goed gedrag) pa e por traha na Merca (tussen haakjes Ministerio Publico a yega na un deal cu nan lo no persegui Henny mas, si ex- lider di AVP no bai den beroep y a cambio ta haya bewijs van goed gedrag y no ta ehecuta su castigo), y ami ta wordo considera un delincuente pa Ministerio Publico, e maximo autoridad di husticia a contesta mi asina aki: “U weet toch als priester dat er geen rechtvaardigheid is in deze wereld”.
E ta hasi mi corda e palabranan di un ex hoofdofficier van justitie na Aruba den e caso contra un ex Minister di Husticia di MEP: “hij is niet zomaar iemand”. Ami tambe a yega na e mesun conclusion, pero ohala mi ta kiboca, na Aruba no ta existi ley pa un, ley pa tur.