Playoff final HEINEKEN di Aruba Softball Bond dedica na Minguel Tromp y Emelina “Mamai” Loopstok a continua diaranson anochi riba veld di Kudawecha. Serie final di best out of 5 entre Royal Power y Pizza Hut Monsters a empata na dos. Despues cu Pizza Hut Monsters tabata tin Royal Power lomba contra muraya y tabata comandando e wega number 4 unda tur cos tabata mustra cu nan lo celebra pero e ekipo di Royal Power kendenan ta conoci como un ekipo cu “never ta give up” ta rally deep den wega den inningnan 5 bay ariba pa finalmente seya un victoria di 8-6 riba e muchanan di “Nacho” pa asina empata e serie 2-2 y forsa un wega desisivo pa determina kende lo bira campeon di Aruba pa cu aña 2016. Jomark Flanegin ta preta brasa y ta bay 7 inning pa pone e victoria riba su nomber. E champion pitcher di campeonato Richinell Matos ta resulta pitcher perdedo ricibiendo relevo di Arjen Mathilda den di 7 entrada. Royal Power 8 careda, 11 hit, 1 eror. Pizza Hut Monsters 6 careda, 9 hit, 2 eror. Miho bateadonan pa Royal Power a resulta Eldrick Dijkhoff di 4-3, Gregory Krosendijk 3-2, Giandrick Lacle 1-1, Jomark Flanegin 2-1. Pa Pizza Hut Monsters ta destaca na bate Jason Orman di 4-2 cual porcierto tabata un cuadrangular riba cura den rightfield y despues un triple cu 2 na base, Derward Ruiz ta bay di 4-2, Joshua Wever di 3-2. Mesora inicia e wega final y decisivo unda Pizza Hut Monsters ta probecha di Jair Thompson kende no por a bin cla cu su control den prome inning y ta anota 5 careda. Royal Power ta corta bentaha 5-2. Pizza Hut Monsters ta amplia score 6-2 pero Royal Power ta bin bek den wega cu un cuadrangular di Eldrick Dijkhoff cu 2 na base pa bolter e score. Den bom di 4 inning cu Royal Power na bate y score 13-12 pa Royal Power e ekipo di Pizza Hut Monsters corectamente a appeal riba e reglamento di campeonato unda ta stipula cu den siman no lo habri inning despues di 12am. Umpire ta para e wega y di acuerdo cu e codigo international di (ISF) WBSC Softball Division y tambe Reglamento di Campeonato Artikel 14 y 57 ta stipula cu weganan di Playoff momento cu wordo para lo continua esaki desde unda el a keda. Pues un serie di playoff yena cu emocion unda ambos ekipo no kier baha cabes pa otro y ta luchando te final pa e titulo. Un cos ta sigur cu e siman aki Aruba lo conoce su campeon. Pizza Hut Monsters lo titular campeon pa prome biaha den historia? Of Royal Power ta logra retene su titulo? Riba tereno esaki lo wordo contesta y abo por ta testigo. Softball a la carga!!!!