Sr. Rowald Tromp pa basta tempo caba ta den publicidad, pa motibo cu e no tin luga di biba y caminda cu e ta actualmente, ta un centro di rehabilitacion pa adictonan. El a bin aki pa 1 luna y ya caba ta 3 luna cu eta eynan. Pero di aki tambe, su tempo a yega y pa dialuna proximo, e lo mester bandona e luga. E ta amplia mas ariba su situacion.
Sr. Tromp ta splica di e fayonan den diferente sistema, fayo den gobierno, den Departamento Social, e fayo den Medwork. A bin dos representante di DPL, cual segun esakinan, nan ta bin den representacion di gobierno. E dos personanan aki a traha un plan cu hospital, pa sak’e for di eynan. Tabata tin un persona conoci en comun, cu a tuma Sr. Tromp como opvang. DPL a priminti cu den dos pa 3 siman, e lo keda cla. Nan a priminti asina hopi cos, y al fin la cabo, Sr. Tromp a firma un papel pa 1 luna, pero ya caba ta bayendo pa tres luna.
Den e casi 3 lunanan aki, e representante DPL, Sr. Janiro Eisden no a presenta ni mustra cara. Minister di Asuntonan Social, Sr. Glenbert Croes ta na altura, trahadonan di gobierno ta na altura. Sr. Tromp ta sigui bisa cu no ta pasa un dia cu e no ta sclama pa yudansa. Tur hende por sigui su storia ariba Facebook.
Unda cu Sr. Tromp ta actualmente ta, e no por keda mas. Tin cierto reglanan cu ta pone cu Sr. Tromp no por keda mas eynan. E ta ‘homeless’.
Sr. Rowald Tromp a sigui bisa, cu e tin gana di traha. Pero door di mal decision tuma, y den su desesperacion, el a haci algo malo, door di bay hiba droga pa Merca, unda el a cay cera. Ora el a bin bek Aruba, el a perde su cas. E ta un persona cu no por traha, e tin dos buraco bou di su pia. E tin MRSA. E ta cobra loke el a califica di ‘un miserable bijstand’. Esaki ta algo cu e no por compronde. Medwork a traha dos rapport, sin cu niun dia niun di nan a bin wak’e. For di 14 di december pa 30 di mei, hopi cambio tabata tin na su pia. Y awo el a bira su pia. Medwork no a evalua Sr. Tromp ainda, door di su MRSA cu e tin.
Sr. Tromp no lo bin na aanmerking mas pa un cas di FCCA y cu loke e ta cobrando na bijstand, e no por paga niun luga pa e biba. E tabata tin su trabao, pero door di problema di su pia, despues di dos aña, e no por traha mas y SvB no ta cubri mas despues di esey.
Loke cu Sr. Tromp ta pidiendo ta un aumento di su bijstand pa e paga luga pa e bay biba. Asina e no ta molestia niun hende. Ni minister ni Medwork ni Departamento di Asuntonan Social no ta haci nada. Tur hende tin un hefe, y si e no por yega na Medwork, ni Departamento di Asuntonan Social, e ta bati na porta di Minister. Pero si e tampoco no por yud’e, pakico nan t’ey anto, Sr. Tromp ta bisa. E ta pidi pa haci politikeria pa su situacion.
Pero e centro caminda cu e ta kedando actualmente, mester di nan luga. Nan a keda di bah’e na DPL y pa DPL deal cu e situacion. E ta pidi pa tur hende stop di priminti, ya cu e ta cansa di tanto promesa. E tin tempo caba ta pidiendo yudansa. E ta pidi Departamento di Asuntonan Social, na e directora, pa stop di piki pieuw den su pasado. Stop di husga.
E no por pidi abogado liber, e ta un caminda di cruz, ya cu e no tin transporte. Esey ta un problema di mas grandi cu e tin.
Un biaha mas, e ta pidi pa tur hende pa stop di papia, e kier mira mas hecho. Ora cu e bandona e centro, unda e bay? Tur hende tin facil papia, pero niun hende no ta pone nan mes den su sapato. Un biaha mas, e lo ta homeless.