Dialuna, 24 October 2016 – Ariba “World Polio Day” Rotary Club of Aruba tambe a forma parti di e causa di Rotary International. “World Polio Day” tin como meta pa aumenta conocemento, fondo y sosten pa pone un fin na e malesa di polio na mundo, cu por wordo trata door di un vacuna. Casi 30 aña pasa Rotary International hunto cu otro partners a lansa e iniciativa “Global Polio Eradiction”. Desde comienso di e iniciativa aki e caso nan di polio a baha drasticamente di mas o menos 350.000 caso pa aña na 26 caso so confirma te cu 19 September 2016.
Aunke cu na Aruba nos no conoce caso mas di polio, door di e vacuna cu tur baby ta ricibi via Stichting Wit Gele Kruis, Rotary Club of Aruba, formando parti di un organisacion internacional, kier a conscientisa pueblo di Aruba tocante e malesa di polio. Na e reunion semanal di Rotary Dr. Jan Hubert di Jeugdgezondheidszorg a duna un presentacion tocante polio. Dr. Hubert a splica cu na Aruba e ultimo caso cu a wordo registra di polio ta den añanan 60.
Pa conscientisa pueblo di Aruba a proyecta e logo official di “End Polio Now” riba e muraya di Cas di Cultura dialuna anochi. Despues di e reunion semanal un paar di miembronan di Rotary y Rotaract hunto cu Dr. Hubert a bay na Cas di Cultura pa presencia esaki.
Rotary Club of Aruba kier a gradici Dr. Jan Hubert pa su presentacion y señora Vicky Arens-Tjon A Tjoe Directora di Cas di Cultura pa a forma parti di “World Polio Day”.