Desde siman pasa Aruba tambe a conoce su prome caso di COVID-19. Den e espirito di por ta un sosten pa nos comunidad den e situacion aki, Rotary Club Aruba a tuma contacto cu Rode Kruis Aruba. Di e forma aki nos a mantene nos mes altanto di nan preparacionan pa cu combatimento y tratamento di e virus aki y pa identifica cualkier ayuda cu Rotary Club Aruba lo por brinda e organisacion.
Den e ultimo tres siman nan aki, Rode Kruis Aruba a activa un “Team di Calamidad” y ta preparando su team pa duna sosten pa cu e situacion di COVID-19 aki na Aruba. Rotary Club Aruba a bin compronde cu tin varios training a tuma lugar pa asina prepara e team aki mihor cu ta posibel, por ehempel con pa usa e Personal Protective Equipment (PPE) corectamente, tambe nan a ricibi un anochi di informacion tocante COVID-19 door di Dr. Salazar di Dienst Besmettelijke Ziekten. E “Team di Calamidad” di Rode Kruis a ricibi tur e training nan aki pa asina prepara nan mes pa por duna sosten na Gobierno di Aruba, na momento cu esaki wordo pidi. Na e momento nan aki Rode Kruis ta dunando asistencia caba, na peticion di Gobierno di Aruba, pa distribui cuminda na e persona of famia nan bao cuarentena.
E preparacionan aki tin su gastonan, y mesora e Directiva di Rotary Club Aruba a reuni pa asina evalua posibilidad di ofrece sosten financiero na e organisacion cu ta preparando nan “Team di Calamidad” pa actua den caso cu esaki bira necesario. A base di esaki Rotary Club Aruba a tuma e decision di otorga Rode Kruis Aruba un donacion di Afl. 25.000.
Rotary Club Aruba ta gradici e comunidad cu ta hasi donacionan manera esaki posibel, atraves di e diferente eventonan di e club den transcurso di aña. Rotary Club Aruba tambe ta uni su mes na gradici y elogia organisacionan cu ta bini hunto na e momentonan aki y muy especial na tur cu ta trahando den sectornan esencial den combatimento y tratamento di e COVID-19. Rotary Club Aruba ta convenci, cu hunto nos lo supera e momentonan dificil aki..
Sigui nos ariba nos pagina social “Rotary Club of Aruba” pa keda na altura di ultimo informacionan.