E aña escolar 2016 – 2017 a inicia yen di energia y entusiasmo y un biaha mas Rotaract ta sigui cu su compromiso cu e alumnonan di examen klas di Filomena College Mavo. E biaha aki a dicidi pa inicia cu un excelente orador, Jalken Antonia, cu tabata na Aruba pa duna speech di motivacion na algun compania y asina a logra incorpora den su schedule druk, un sesion di 1 ora cu e alumnonan di Filomena College Mavo.
Diahuebs ultimo e orador Jalken Antonia, a cera conoci cu e alumnonan y a duna un excelente speech interactivo di motivacion y inspiracion na e 64 alumnonan, compartiendo su experiencia di bida, pensamento y kico ta e hermentnan necesario pa uza pa logra exito personal. “Abo ta keda esun principal pa scoge si bo kier ta exitoso y logra loke bo propone den bo bida. Lanta tur mainta y bisa bo mes cu bo lo slaag e aña aki y dedica 90 minuut diario na bo lesnan!”, ta loke Jalken Antonia a enfoca riba dje cerca e alumnonan.
Na final di e speech cautivador y sigur motivador pa e alumnonan, Rotaract a regala cada studiante un ‘back to school start kit’, cu ta contene algun material di scol necesario. E alumnonan a keda sumamente encanta cu e regalo, specialmente e atencion cu Rotaract a demostra na nan, brindando nan e oportunidad di por a presencia un orador asina fantastico. Un danki di curason di parti di tur e alumnonan como tambe e maestronan y directiva di Filomena College Mavo na tur e miembronan di Rotaract como tambe Jalken Antonia pa e bunita atencion y gesto aki.