Rotaract Club of Aruba a organisa e di 27 edicion di ‘Back 2 School’

Miembro y boluntarionan di Rotaract Club of Aruba por mira atras riba un otro exitoso
edicion di e proyecto ‘Back 2 School’ caminda a logra yuda un total di 78 mucha cu articulo pa scol. Eproyecto aki ta e prome cu e club a yega di organisa despues di a wordo funda na december 1991, haciendo e edicion aki e di 27 biaha pa e club.’Back 2 School su meta ta pa prepara muchanan pa un aña escolar exitoso. Tur aña e club ta traha serca cu instacianan cu tin mas conocimento riba kende lo por haci uzo di un ayudo cu e preparacion pa aña escolar nobo. Asina aki ta tuma contacto cu scolnan, instacianan gubernamental y ta revisa peticionan cu ta drenta via rednan social di e club pa scohe un grupo di mucha pa participa den e projecto. Durante lunanan di juli y augustus miembro y boluntarionan a aserca comunidad pa nan donacion. Asina aki e club a logra colecta diferente articulonan di scol necesario pa por sera un pakete completo cu ta wordo duna na muchanan cu mas mester di esaki. Alabes, e grupo encarga pa organisa e proyecto a organisa un dia cu ta ambos dibertido y educativo pa e muchanan. E aña aki a opta pa organisa un dia placentero pa 34 mucha entre 12 y 14 aña cu Futura Lab. E dia a cuminsa cu un bon desayuno na cede di Futura hunto cu miembro y boluntarionan. Durante e mainta aki e muchanan a haña un presentacion y siña over di programanan inovativo manera Hour of Code, Mindflex, Makey Makey y e VR Escape Room. Tambe, pa di dos aña den colaboracion cu Kok Optica, a opta pa duna e muchanan un chekeo di wowo y yuda esunnan cu mester un bril yega na uno. E dia a sigui na Palm Beach, caminda e muchanan a jega cu e busnan di De Palm Tours pa asina
subi e catamaran di Red Sail Aruba. Miembro, boluntario y e grupo di muchanan a haña chens pa snorkel y disfruta den lama bou guia y supervision di crew di Red Sail Aruba. Tambe, e muchanan a disfruta di un BBQ lunch patrocina pa Aruba Wine and Dine. E exito di e proyecto aki ta danki na e miembro y boluntarionan cu a logra colecta suficiente articulo pa prepara un pakete pa e 34 mucha nan. Cada mucha presente a ricibi un tas yena cu articulonan pa
scol, uniform, care packages den colaboracion cu Compra N.V., y tambe un gift certificate di Super Shopping. Alabes, cu e donacion ricibi for di e clientenan di Dyon Center y sponsornan, e club a logram yuda un total di 44 mucha extra cu diferente paketo y articulonan pa scol.
Un danki di curason mester bai sigur na tur miembro di Rotaract Club of Aruba, specialmente e ekipo encarga pa organisa e proyecto aki, boluntarionan, miembronan di Rotary Club of Aruba y Interact Club of Aruba cu a yuda haci e proyecto aki atrobe uno exitoso. Alabes, no por lubida e gran coperacion y contribucion ricibi for di Kok Optica, Dyon Center, De Palm Tours, Super Shopping, Totto, Water’s Edge Restaurant, ITP Caribbean y tur e otronan sponsor nan cu a contribui. Rotaract Club of Aruba kier gradici e pueblo di Aruba cu ta sostene e proyecto aki pa 27 aña caba door di haci un donacion. Alabes, Rotaract Club of Aruba kier desea tur studiante un exitoso aña escolar 2019- 2020.

Comments

comments