Rotary Club of Aruba lo ta teniendo su feria anual, esta e famoso Fiesta Rotaria. Esaki lo bay tuma luga riba diadomingo 2 di April 2017. Rotaract Club of Aruba tambe lo ta presente un biaha mas cu su stand “Aruba Delight”.
Na e stand “Aruba Delight” bishitantenan di e feria lo por cumpra snacks conoci riba nos isla, manera entre otro pastechi, kroket, sanger yena, pan cu sate, pan cu hamburger, sin laga afo e dushi sopi carni y sopi oester. Tambe lo ta bay tin un gran variedad di dushi bolo y otro cos dushinan. Pa kita sed, Rotaract su stand lo tin pa ofrece nos famoso batido di fruta fresco, awa di lamoenchi y coffee.
Manera tur aña, Fiesta Rotaria ta e evento mas grandi unda Rotaract Club of Aruba ta recuada fondo. E fondonan recauda durante Fiesta Rotoria ta haci posibel pa por realisa proyectonan cu ta beneficia nos comunidad. Cada aña e fondonan ta destina na proyectonan manera “Back to School” unda cu ta brinda un grupo di mucha un dia educativo y ameno prome cu scol habri na Augustus, hunto cu tur material necesario pa cuminsa e aña escolar bon prepara. Tambe pa proyectonan manera “Un P’ami, Un P’e” unda cu nos miembronan, cu ayudo di comunidad, ta colecta un gran cantidad di comestibles y ta parti esakinan na nos grandinan di S.A.B.A. of un organisacion den comunidad. Sin laga afo proyectonan manera Pasa Pret cu Rotaract, unda Rotaract ta crea un feria pa nos muchanan, y tambe e famoso seminario You Inc., unda Rotaract ta trece oradornan internacional pa nos comunidad.
Rotaract Club of Aruba kier invita un y tur pa pasa diadomingo awo, 2 di April 2017, riba e parking lot di Stadion Guillermo Trinidad di 10 di mainta pa 6 or di atardi, unda por pasa un dia ameno cu famia y alabes disfruta di e dushi surtido cu “Aruba Delight” tin pa ofrece.