Ora hende bin hunto, cosnan special ta sosode. Esey por ta un conclusion cu ta saca for di e buki cu a keda presenta e siman aki na Prome Minister Mike Eman. Skirbi y compila pa Rosanna Koelewijn-Tromp, e buki ta ilustra e coleccion di cuadra cu ta dorna e murayanan di Cas di Grandinan na San Nicolas.
Inicialmente, ta un proyecto cu Departamento di Obranan Publico a cuminsa aña 2012 riba iniciativa di Ing. Iris Giel. Un bes cu a keda completa, e autor a tuma riba su mes pa sigui documenta e coleccion mas di cerca y asina a resulta den e publicacion. E buki ta mustra e 90 cuadra colga na e cas di cuido caminda 107 persona local a participa, reparti den 11 grupo di pintura, incluyendo personan special y tambe mucha.
Koelewijn-Tromp a duna Minister President Eman e honor di ricibi e prome copia di e buki. “Mi ta kere cu Minister President y henter pueblo di Aruba ta na altura cu na centro di cuido tin asina un bunita coleccion,” asina e autor a expresa contando cu Premier Eman a keda asombra.
Como un bishitante regular di casnan di cuido, Prome Minister Eman a yega di mira e cuadranan, pero nunca a cay riba e storia nan tras. Awo tur hende por wak esey den e buki. Buki ta obtenibel De Wit Stores y tambe lo entrega un copia na e diferente scolnan rond di nos isla.