Cuminsando for di diaranson October 11, 2016, e hoben escritora Rosabelle Illes lo ta dirigiendo un tayer di poesia na e plataforma creativo di arte BEAM cu ta situa den un monumento den Oranjestad na Steenweg 17-19. E tayer ta consisti di un les di poesia pa siman durante 4 luna, pues en total 16 les. E tayer lo trata tres aspecto di e disciplina di poesia: e skirbimento, e presentacion y e publicacion di poesia tanto online como ‘in print.’ Tur persona di 18 aña pariba por registra door di manda nan nomber, number di telefon y e-mail adres na [email protected] of 6005895. E participantenan lo topa tur diamars pa 6’or di atardi te cu 8’or di anochi na BEAM. Asina cu un total di 10 participante inscirbi, BEAM lo cera registracion como cu e grupo cu Illes ta desea di forma ta uno chikito pa sigui 4 luna cu otro. “Mi a experencia cu den tayernan di skirbimento e ta beneficioso pa tene e grupo chikito pa e contacto personal no bay perdi. Bo mester tuma tempo pa lesa otro su obranan y pa traha individualmente cu cada participante. Tambe mi ta realisa cu aunke 4 luna ta pasa lihe, 16 les ta un compromiso cu bo ta haci. Pues ora bo forma un grupo sera cu ta dedica na un disciplina, nos mes lo motiva otro y e ta bira mas manera un ‘get together’ cu un les, e atmosfera ey semper mi a trata di crea den mi tayernan.”
Illes no ta desconoci den e mundo di arte. Den e ultimo aña, el a cosecha hopi exito riba tereno di literatura na Aruba. Algun luna atras, el a introduci su tercer buki titula TITLE, consistiendo di storianan cortico, poesia y pensamentonan. TITLE a wordo bon ricibi den e comunidad di Aruba como tambe den exterior. Illes a wordo selecta pa representa Aruba su literatura na e Feria di Buki Internacional del libro de Bogota (FILBO) na Colombia. Despues di su presentacion na FILBO den e luna di april, Illes a introduci TITLE na Corsou den luna di Mei y New York den e luna di Juni. Aki na Aruba, e ta conoci pa su manera unico di presenta su poemanan unda cu e ta colabora cu otro artistanan incorporando diferente disciplinanan den su obranan manera musica, baile, teatro, arte visual y video. Su ultimo poema #Hende, unda cu e ta toca e tema di exito, igualdad y envidia expresando e frase “nan a laga sa cu rubiano ta kibra rubiano…” a ricibi hopi atencion riba medionan social y television. E video di e poema aki, unda cu por mira caranan conoci na Aruba expresando e frasenan, a wordo uza na dos ocasion durante e ceremonia oficial di naturalisacion na gabinete di Gobernador.
Yegando na final di un aña exitoso, Illes a expresa cu e no kier a laga e oportunidad bay di dirigi un tayer di poesia pa asina comparti su conocimento y experencia y yuda otronan cu tambe ta interesa den literatura, en particular den skirbimento di poesia. “Ta asina cu Michael Lampe, fundador di BEAM, a acerca mi pa dirigi un tayer di poesia y mesora mi a bisa si. Den pasado mi a duna tayer di poesia pa hobennan na Art Rules Aruba pero esaki tawata pa solamente dos siman. Semper mi a sali for di e programa ey cu satisfaccion pero na mes momento cu un duda si mi a comparti tur loke mi tawata por y si nos tawata tin suficiente tempo pa desaroya hunto y pa despues crea obranan riba un otro nivel. Pues semper mi a desea di dirigi un tayer mas largo, cu tempo pa procesa, y pa sera un comunidad chikito di escritornan.”
E tres aspectonan cu lo wordo trata den e tayer — skirbi, presenta y publica poesia — ta terenonan cu Illes a explora extensivamente apesar di su edad hoben. Y manera ta custumber cu e ta colabora cu diferente artista den su obranan, den su tayer tambe e ta invita otro personanan pa duna presentacionnan cortico tocante e tres aspectonan. “Mi a ricibi y ta sigui ricibi hopi ayudo den mi carera, pesey mi lo invita algun di e personanan aki cu ta yuda mi riba terenonan manera skirbi na Papiamento corecto, combina poesia cu musica y prepara bo presupuesto pa pidi financiamento, entre otro. Tur les lo bay ta diferente, nos lo sali for di BEAM y haci ehercicionan otro caminda y lo mi moldia e plan pa pas cu e grupo y cu e 10 individuonan.”
Pa mas detaye tocante e tayer di poesia dirigi pa Rosabelle Illes y pa inscribi por tuma contacto cu Pilar Flores di BEAM na [email protected] of 6005895.