Di parti di ATA a haci un encuesta cu a resulta hopi positivo pa nos turistanan di barco crucero. Segun CEO di ATA, Ronella Tjin Asjoe-Croes, a papia di cifra y por ta hopi contento cu e resultadonan. Pero hopi importante ta sigura cu tur paso ta continua, pa sigura cu e experiencia di e bishitante ta uno sigur cu ta surpasa su expectativanan. Pa esaki mester midi, segun Tjin Asjoe-Croes. ATA hunto cu APA a haci diferente investigacion den pasado, pero e aña aki, ATA a inicia un encuesta cara a cara, bao di nos bishitantenan crucero. A haci e prome total di esaki, den lunanan di Maart y April di e aña aki. A encuesta 460 bishitante crucero. Lo continua cu e encuestanan aki pa e aña aki y lo cubri e temporada crucero completo, incluyendo e lunanan di otro aña tambe. Resultadonan ta locual cu kier a comparti y e encuesta ta dirigi su mes riba midi e patronchi di gasto di e bishitantenan. E satisfaccion di e bishitante, e deseo di e bishitante pa regresa Aruba. Tambe kico e bishitante ta inclui como partinan atractivo na Aruba y kico ta epuntonan di mehoracion tambe. Si mira ora cu puntra e bishitantenan con importante Aruba tabata como parti di e itinerario total den toma di nan decision pa tuma e barco crucero y pa bishita of scoge e itinerario respectivo, Aruba, un total di 66% di esnan cu a wordo encuesta a indica cu Aruba como parti di e itinerario tabata e motibo principal pa a scoge e itinerario ey. Sigur un resultado hopi positivo. Ora cu a midi e patronchi di gasto di e bishitantenan, averahe nan ta gasta un total di 108 dollar pa persona durante di nan estadia na Aruba. Esaki ta exclui paketenan prepago y ta den liña cu e ultimo encuesta cu a haci tambe cu a cubri e periodo di October 2014 pa Maart 2015. Pues e patronchi ta keda stabil y con nan ta gasta nan placa aki na Aruba: shopping, keshi Hulandes ta keda un punto atractivo, joyas, F&B tambe ta score halto y tambe tours na Aruba como tambe compra di joyas. Esey ta refleha tambe ta kico ta wordo ofreci na Aruba. Importante ta e puntonan cu a score hopi halto. 55% di e bishitantenan a indica cu nan ta hopi satisfecho cu nan bishita na Aruba. 36% nan ta indica cu nant a satisfecho y e satisfaccion ta bin primordialmente door di e amabilidad di nos hendenan, nos beachnan y na di tres luga e siguridad cu nan ta sinti durante di nan bishita.
Puntonan di mehoraciont a inclui e variedad den e cuadro di F&B, e variedad na tours cu ta wordo ofreci y tambe otro punto di mehoracion ta variedad den area di shopping.
48% di esnan encuesta ta indica cu nan deseo ta pa regresa Aruba, pa medio di un barco crucero, 35% a indica cu nan deseo ta pa regresa, pero e biaha aki cu avion, pues e ora ey esaki ta bira un bishitante crucero cu ta converti den un bishitante cu ta keda mas largo riba nos isla. Hopi importante ta cu 63% di esnan cu a wordo encuesta, e probabilidad ta hopi halto cu nan ta recomenda Aruba bou di nan circulo di contacto. Aruba sigur a score halto cerca nan y esaki ta un di e vehiculonan mas importante di promocion pa Aruba cu ta e mensahe boca a boca, segun Tjin Asjoe-Croes.