Ronella Tjin-Asjoe Croes, CEO di ATA, a splica cu e grupo di Venezolanonan cu ta bin saca dollar y e grupo cu si ta bin disfruta di e isla durante un vakantie, bin gasta placa na Aruba, no por haci un distincion entre nan. Tin diferente manera cu ta purba di haya un indicacion si. Pero no por parti’e di tanto a bin pa e turista normal y tanto ta e turista cu ta bin pa motibo pa saca dollar y haya acceso na e dollar.
No por haci e distincion eynan. Loke si por bisa ta cu en berdad, manera a señala diferente biaha, e parti di crecemento tabata inclui tambe. Sigur esunnan cu a bin pa haya acceso na e dollar Mericano. Esey a fluctua conforme cambionan politico y economico na Venezuela mes. Casi e ta for di control, aunke cu ta purba di control’e. No ta kita cu e Venezolano di semper, esun cu ta nos mercado number 1 den gastamento durante nan bishita, nan tambe kier ta e base. Pero tambe ta conciento di e hecho cu e mesun Venezolanonan ey cu conoce y cu stima Aruba pa e base y e experiencia cu nan ta haya semper, tambe mescos cu e localnan a wordo confronta cu un fluho di bishitante di nan mesun pais, cu nan no ta custuma cune. Y sa tambe cu sigur tabata tin preocupacion di nan banda pa e parti eynan. Locual ta hopi importante pa bisa ta cu e mercado ta normalisando. Es decir cu e mercado di Venezolano cu ta bin awor aki, ta esun cu a bin semper. Tin cierto indicacionnan cu ta pone cu esey ta djis simplemente confirma esey. Ta mira cu mas Venezolano ta kedando den hotel. Ta mira cu hotelnan di marca y di taya ta mirando un aumento den cantidad di Venezolano. Ta mira cu e estadia di e Venezolano a bin ta subi y ta mira cu e cantidad di Venezolanonan cu ta keda na un otro tipo di acomodacion, un apartamento, kisas mas barata cu ta tipifica esunnan cu tabata bin, a bin ta baha e aña aki. No obstante e bahada den Venezuela, ta kere toch esaki tin su parti positivo pasobra e mercado mester a yega na e punto di normalisa bek pa asina tin sigura cu en berdad e perfil di e Venezolano cu ta bin ta esun cu por bin Aruba, esun cu tin e placa y esun cu ta cuadra cu e perfil cu semper nos conoce. Pa nos mes como local y pa otro bishitantenan, incluso e bishitantenan di Venezuela mes cu semper a bin, ta sigur impacta e experiencia, e biba y sa di practicanan cu nos no tabata custuma maleta riba caya, hendenan na supermercado. Eseynan con cu bay, con cu bin tin cu reconoce cu nan ta trece iritacion. No solamente cerca e localnan, pero cerca e bishitantenan, incluso esunnan di Venezuela mes. E tipo di cosnan ey no ta Aruba y ta kere cu mester wak e banda positivo cu e mercado ta normalisando tambe y mester sigui traha hopi duro pa nos cifra y ingreso ta bek den e plachi positivo, segun Tjin Asjoe-Croes.