Dia di 27 di September sigur ta un fecha importante, caminda cu a celebra dia Internacional di Turismo. Segun CEO di Aruba Tourism Authority, Ronella Tjin Asjoe-Croes, turismo pa Aruba ta hopi importante. Sigur e ta e core activity di ATA pa promove, pa atrae bishitante, pero tambe pa desaroya turismo riba nos isla na un manera duradero y sostenibel. E ta hopi importante pa refleha riba esaki. Ta uze logicamente pa presenta diferente pensamento y simula refleho riba diferene topico. E aña aki a celebr’e na un manera unico. Na un manera diferente. Tur aña tin un conferencia pa studiante, pa stakeholder den e industria. Ta comparti plannan pa e aña cu ta sigui. Pero e aña aki a celebre atrabes di e conferencia internacional Happiness 360. Esaki a wordo haci hunto cu United Nations World Tourism Organization, unda cu el a resulta den un exito rotundo y nan ta satisfecho cu esey. A enfoca riba diferente topico. Turismo como vehiculo pa siguridad, pa bishitantenan cu ta busca memorianan feliz y momentonan feliz, pero tambe turismo como vehiculo pa felicidad pa nos mesun comunidad. E importancia di midi exito di turismo no solamente a base di cantidad di bishitante, of a base di cantidad di placa cu e ta laga atras, pero ta importante pa laga hende central. Midi exito di turismo, pa wak con feliz y contento hendenan riba nos isla ta sinti pa e desaroyo di nos isla pa e desaroyo di turismo. E bunita ta cu a bin ta midi esaki pa varios aña.
For di 2011 ATA a bin ta midi calidad di bida di nos habitantenan. Pa esaki a trata diferente colaborador. A uza e formula cu United Nations World Tourism organization ta uza pa midi esaki. A haci esaki na Aruba. A haci encuesta bao di 1500 persona y e resultadonan di esun mas recien a comparti durante di Happiness 360 Conference, cu no obstante di desacuerdo of kisas problemanan cu nos tin, por sigui ta contento cu nos por carga e slogan di Aruba, One Happy island, mirando cu gran parti, 78% pa ta exacto di nos poblacion, ta feliz y gran parti 76% ta satisfecho cu nan bida tambe.
Sigur esey ta un bunita mensahe durante di e conferencia y fuera di esey a enfoca riba tendencianan recien y tambe riba e importancia di e laso entre turismo y cultura, y mantencion di autencidad y herencia cultural, segun Ronella Tjin Asjoe-Croes.