Despues di un encuesta haci den restaurantnan di Aruba ATA tin un miho bista pa nos turistanan cu ta yega Aruba segun Sra. Ronella Croes.
ATA ta haci diferente investigacion importante tur aña. E investigacion ta tuma luga internacionalmente, pero tambe localmente. Y awo ATA ta comparti resultadonan di e GAP analisis cu nan a haci bou di restaurantnan na Aruba. Ya caba ATA tin diferente momento cu nan ta reuni cu diferente restaurantnan anualmente, esunnan cu ta provee actividadnan, servicionan di car rental, pa duna un par di ehempel.
Sra. Ronella Croes, CEO di ATA , a splica cu a dicidi di uni forsa cu Universidad di Aruba y tambe University of South Carolina, cu tin un partnership cu Universidad di Aruba, pa asina haci un estudio poco mas academico di unda e restaurantnan ta aworaki den kico nan tin pa ofrece y kico e bishitantenan ta pensa di e calidad y di e oferta cu nan ta haya. Y na unda nos kier bay y nos kier yega.
Tin hopi area di mehoracion den e area aki, y aki ta unda cu ATA kier yuda y facilita restaurantnan participante, pa asina nan tin e instrumentonan y e informacion debido pa haci cambionan specifico. Esaki ta un ehempel atrobe di con ATA ta pone enfoke riba un aspecto asina importante riba experiencia di e bishitante y na kico e ta gasta su placa ora e ta na Aruba. Mas miho e oferta ta, miho experiencia e bishitante tin y e por eleva tambe e patronchi di gasto di e bishitante ora e ta na Aruba. Y esey ta loke ATA tin como punto di enfoke.
ATA ta haci investigacion cu diferente sector aki na Aruba, di con ta facilita y agrega balor na un aspecto atrobe na e bishitante su experiencia, pero pensando riba e impacto economico cu e tin pa Aruba. Segun investigacionnan, 87% di nos bishitantenan ta haci uzo di nos restaurantnan y bou di e bishitante crucero, esaki ta 45%. Pa ATA esaki sigur ta un elemento hopi importante di un vacacion di un bishitante. Importante ta enfoke pa cambia loke mester cambia y mehora nos oferta.