Durante un conferencia di prensa, Luenne Pieters, directora di Departamento di Impuesto (DIMP) a informa con e pago di number di auto a bay te cu awo.
El a cuminsa pa informa cu gobierno a dicidi di pospone ultimo dia di pago pa loke cu falta di belasting di vehiculonan di motor. Esaki tabata prome dia 30 di juni y awo el a bira 2 di augustus.
Segun datonan di DIMP, tin 88.997 mil vehiculo registra di cual e sistema ta mustra cu 71.529 a haci nan pago completo, cu ta un tiki mas cu 84%. Pues esaki ta nifica cu tin 15.204 plachi cu no tin nada paga. Di e cantidad aki mayoría ta number A (12.570), sigui pa V-car (1142); brommer (466); DT (203) y esnan cu nomber (180).
Manera semper ora di tempo di pago di number di auto, ta recorda esnan cu no ta uza un plací number cu ta miho pa entrega esaki, sino lo haya cobransa toch. E aña’ki tabatin 2264 plachi number entrega door cu nan no ta den uzo.
Den e prome periodo a saca 15.603 cobransa adicional pa esnan cu no a cumpli cu prome pago y e boet aki ta 50% di e suma cu mester a paga.
Hopi persona cu a paga via di banco, a haci peticion na DIMP pa comprobante di pago. Un total di 15.603 peticion a drenta, cualnan ta wordo procesa door di tres funcionario. Cada un ta procesa rond di 5 mil peticion. Aworaki falta rond di 4 mil peticion pa procesa ainda.
DIMP ta consciente cu tin keho di clientenan cu no a haya nan comprobante ainda. Esaki ta debi na diferente motibo, entre otro cu tin un suma bieu habri (aña pasa), e formulario tin dato cu no a wordo yena.
Ta consciente cu tin hopi plachi bieu den circulacion, pero tambe tin problema cu espacio pa staciona autonan cu ta wordo confisca.
Riba tur e problemanan ariba menciona, ta buscando solucion.