Riba social media por a nota cu pronto Ronchi De Cuba y Tele Aruba Canal 13 lo lansa e reality tv show nobo #FABPLUS. E concepto, di Ronchi De Cuba, ta wordo co-produci cu Tele Aruba. E show lo concentra riba sinco hende muher cu lo mester realisa diferente proyecto cu sigur ta demanda determinacion y perseverancia. Un show dramatico cu un twist entretenido di comedia y hopi personalidad. “Mi tabata tin e concepto aki pa un paar di aña caba y a dicidi durante luna di Juni pa presenta esaki na Tele Aruba. E idea ta pa entretene Aruba cu un otro produccion nacional caminda cu e mensahe ta cla y raspa” ta locual Ronchi a duna di conoce. E rol di De Cuba como tv producer a sa di trece algun impresionante produccionnan pa television Arubano. Ainda ta corda e atencion nacional cu Aruba Model Search a cosecha durante e 6 seasons di e show. #FABPLUS no ta nada parecido na AMS, Ronchi ta conta, sino mas bien un show cu lo “empower” un y tur pa “face nan fears” y tambe pa pusha nan mes pa surpasa obstaculonan. “E challenges di e show ta varia di episodio pa episodio y tin di haber cu personalidad y actuacion. E show aki no ta uno di moda of modelahe sino mas bien uno di descubrimiento y entretenimiento” De Cuba ta continua bisando. #FABPLUS ta conta cu presencia y actuacion tambe di Fernando Mansur di House of Mosaic y Fabulous Event Planners, camera y editing di Edirik de Jong como tambe hair & make up di Maybelline New York – Aruba y Garnier Aruba. Cada parti di e filmacionan ta wordo recapitula den un episodio y logicamente lo duna un idea di kico tur e participantenan a pasa aden. #FABPLUS lo cuminsa diaranson dia 21 di September na Tele Aruba Canal 13 pa 9.10 di anochi. Aruba sigur por spera un espectacular show local cu artista y actuacionnan local produci pa talentonan local.