Departamento di Calamidad anualmente ta organisa un training di calamidad, e asina yama CaribWave, sea un temblor of un tsunami. E aña aki no ta un excepcion. E training aki lo tuma luga diahuebs 14 di maart. Cuerpo di Bombero ta un di e departamentonan cu tur aña ta participa na e training aki. Sr. Ferdinand Ponson, vocero di Cuerpo di Bombero ta amplia mas ariba e participacion di Cuerpo di Bombero den e training aki.
Sr. Ponson a cuminsa na splica cu asina cu Cuerpo di Bombero haya un alarmering over di esaki, nan ta zorg pa Cuerpo di Bombero ta cla pa esaki. Nan ta saca e trucknan, ponenan ariba ‘high grounds’, pa si algo asina aki pasa, nan lo ta ariba standby, por si acaso algo pasa. Lo zorg pa loke ta famia di e bomberonan, lo zorg pa e famia prome, zorg, dependiendo e midi di e ola, Cuerpo di Bombero ta zorg pa tur cos na cas ta na ordo, pa asina nan por ta cla pa yuda e pueblo tambe.
E rol di Cuerpo di Bombero ta un rol di rescate. Si un otro organo di gobierno ta zorg pa e evacuacion, y ainda tin hende pega, Cuerpo di Bombero ta esun cu lo zorg pa nan tur hende evacua e zona. Si den caso cu no tur hende sali, e trabao di Cuerpo di Bombero ta pa salbaguardia e pueblo, cu ta primordial.
Den caso cu esaki bira realidad, cual no ta deseabel, ya caba Cuerpo di Bombero tin un plan traha caba pa si esaki pasa. Tur bombero ta wordo yama pa drenta Kazerne pa asina en conhunto sali bay yuda e pueblo y tambe purba stabilisa tur loke a pasa, mas lihe posibel.
Por ultimo, Sr. Ponson a haci apelacion na e pueblo pa tuma e tipo di trainingnan aki na serio. Ora tipo di eventonan aki tuma luga, ya caba e pueblo mester tin su plan traha caba, kico y con ta bay haci, unda ta biba, unda por bay. si por bay mas paden (inland), cerca famia, pa ta mas safe. Tur cos ta depende con grandi e ola lo ta y cu ki forsa e lo bin tambe.