Pa casi 4 aña aduana no tabata conta cu su scanmachine pa controla tur container cu ta drenta y sali for di Aruba pa cual awor tur cos ta bek na su luga, segun Roderick Croes director di Douane.
Desde dos aña pasa a cuminsa prepara pa pone e mashin bek den funcion. E tabata tin su reto y contratiemponan, pero por bisa awor aki aleluya, e containerscan ta trahando. Despues di casi sigur 1 aña cu ta intensivamente bezig cu esaki.
Tin hopi hende cu ta pensa cu e control ta bay tarda mas hopi. Pero di un otro banda e control lo bay alivia tambe e trabao cu e douanero tin cu haci despues di esey. Si no haya motibo pa haya control fisicamente despues di e containerscan, e ora e container ta sali y por wordo desaroya di un biaha. Bo no ta bay tin un retraso te ora cu douane bin habri e container. E ta mas lihe, segun Croes.
Croes a agrega cu esaki ta un mobiele container scan. E ta scan containernan, e ta haci trabao fiscal y non-fiscal. E parti fiscal ta scan e manifest, hink’e aden y tambe tin e posibilidad pa link’e cu Asycuda di manera cu e manifest ta bay di biaha aden. E parti non-fiscal ta e parti unda cu ta bay wak den conturanan si por tin arma, si por tin droga, si por tin cualkier cos cu ta ilegal, por wak’e na un manera hopi mas lihe y en bes di warda te ora cu e container ta wordo controla fisicamente.
Tin cu agrega cu tin e parti tecnico, cu a wordo duna pa Siemens. Tin diferente douanero cu a haya training di Siemens mes y ta preparando pa un training mas grandi unda cu e coleganan di Hulanda, di Belastingdienst voor kennis en communicatie, lo bin cu material for di Rotterdam y cu bin cu un training, cual lo yuda e personal hopi mas di cual cu nan tin caba.
Croes a sigui splica cu locual cu a scoge, ta e douaneronan cu tin un analytisch vermogen. No ta tur hende tin e mesun habilidadnan. A kies pa scoge e hendenan basa riba nan habilidadnan y e docentenan tambe lo bay yuda den esey. Lo bay duna training na tanto personal di waf como personal di douane recherche pa e parti non-fiscal.