Segun director di Douane, Roderick Croes, tin dos proyecto di Ferry. Uno cu ya ta reuniendo pa basta tempo caba. Esnan cu kier a bin cu e proyecto aki, a reuni cu Douane, Polis, Kustwacht y imigracion pa hopi tempo, pa wak kico ta e controlnan, kico ta e posibilidadnan, kico tin e leynan riba esaki. A reuni, delibera y discuti riba diferente topico pa e produccion di un fast ferry asina ey. Y e ferry ey lo a nabega entre Aruba, Boneiro y Corsou.
Pero desde siman pasa a bin tende cu tur cos ta cla pa un fastferry for di Paraguana pa Aruba. Tin cu bisa cu tabata un sorpresa pasobra no ta prepara pe, mirando cu e lo pone extra belasting pa Douane. Tin mas aspecto cu ta bin acerca tambe. Mester bay controla hasta e autonan. No solamente e hendenan cu ta baha cu ta bay haci trabao of por keda ilegal, pero di parti di Douane, ta mira e carganan cu ta bin, e autonan cu ta bin cu ta baha, si nan ta bay subi bek, ta bay tin control, kende ta bay core tras di e autonan, si nan no bay Venezuela bek. Si nan bay wordo bendi na Aruba. Tin mas instancia cu lo por tin obhecion riba esaki, pasobra cu lo bay haya por ehempel cu seguro, hende cu ta bin cu nan carga y tambe e Venezolanonan cu ta bin cu nan carga for di waf bay bende. Tin mas instancia cu lo bay tin problema pa esaki. Di parti di Douane, tin cu bisa cu e ta bay pone un belasting hopi grandi riba nan. Tin di bay pensa riba un control mas rigoroso, sigur mirando locual cu ta pasando awor aki na Venezuela.
E ta mas cu un barco crucero. Eynan pasaheronan ta baha, caminda cu ta controla si tin cualkier producto ilegal, pero di un otro banda tin e parti tambe di e mercancia. Pa un auto cu yega aki ta un producto cu por baha y si e baha, e no ta baha invoerrechten y e control lo bira mas dificil pa Douane. Tanto esey como e parti di droga y arma, cu tin un problema cune caba for di Venezuela.
E auto mes riba su mes, ora e drenta, normalmente e mester paga invoerrechten si e bay keda Aruba. Esakinan ta auto cu ta bin y nan lo mester bay bek. Pero den e caso aki, si nan no bay bek, nan no paga invoerrechten, nos lo bay tin problema cune. Esaki ta bay pone hopi belasting riba e aparato di Douane, segun Croes.
Cu e proyecto di Voice, a sinta con ta bay pone un miho control. Den e caso di e ferry for di Venezuela, no a tende nada y no a wordo involucra y esey tabata un poco mas fastioso, segun Croes.