Pa locual cu ta trata Barcadera, ta un ISPS Gebied y nan a bin cu ley pa esey. E ta un tratado internacional cu a bin y aki na Aruba el a wordo cambia pa un ley pa Aruba y esey ta wordo implimenta, segun director di Douane, Roderick Croes. Naturalmente, Douane ta contra di algun procedura. Dos siman pasa Croes a papia cu Directie Scheepvaart pa wak con por drecha e procedura y evalua kico ta bayendo fout y con por drech’e.
Un procedura cu SADA a trece dilanti, ta e Douaneronan mester baha for di auto, baha door di un draaideur y despues drenta auto bek paden, cual na su luga, segun Croes, nan ta sinti nan un poco menos. Di un otro banda, ta haya cu ASTEC cu tin nan procedura, kier sa cada momento kier sa cuanto hende tin riba waf y asina aki nan sa cuanto hende tin.
Lo por yega na un otro manera tambe pa por conta cuanto hende tin riba waf.
Croes a splica cu e Douaneronan no ta wordo controla, sino nan ta wordo conta. Eynan, si acaso si yega asina leu, e ora esey no por. Un compania di siguridad tin cierto autoridad, pasobra si bay subi tereno priva, e ora tin cu somete bo mes na e reglanan di e doño di tereno. Den e caso aki, Douane ta autoridad y nan ta traha segun ley y ley ta permiti Douane pa haci cierto trabaonan.
E Director di Douane a sigui splica cu manera cu Barcadera ta bayendo, e ta bayendo bon, sin ningun problema. No a tende nada mas. E bahamento no ta bay stroba e trabao, vooral si nan por pasa paden. Ta den waf nan ta keda y no tin problema cu esey. A yega na un entendimento cu ASTEC, cu e procedura pa banda di pariba, esta banda di container, eynan si e hendenan lo tin cu baha for di auto, pero banda pabao, ta tene como un douane gebied, unda cu nan mester wordo controla. Te hasta e trahadonan cu ta subi waf pa haci trabao, lo mester pasa eynan pa Douane tin su control.