Diahuebs e klas nobo di cuidado di preso di KIA a inicia. E klas aki ta e prome cu ta haya e guia conforme e sistema nobo. Esaki tambe ta forma parti di e reorganisacion cu a keda complementa. Antes e tabata asina cu e trahadonan di KIA tabata haya guia como “penitentiair beveiliger” of “penitentiair inrichtingswerker”, pero awo nan a scoge pa bin cu un opleiding cu ta mas largo unda cu tur hende ta cuminsa den e mesun klas, caminda ta garantisa cu tur hende tin e mesun base. E opleiding nobo aki lo bay dura 3 aña.
Den prome 2 añanan tur hende ta haya e mesun vaknan, mientras cu e di 3 aña ta bira un aña di specialisacion unda cu nan ta scoge pa bira sea un “penitentiair beveiliger” of nan ta scoge pa bira penitentiair inrichtingswerker, asina e Director di KIA, Rocco Tjon, a remarca.
E beneficio di esaki ta cu nan por bay mas diep den e materia y na mes momento tambe KIA a scoge pa esaki, pasobra nan ta busca mas coneccion cua nivel,cu otro opleidingen manera por ehempel esun di Polis. Esun cu e klas nobo di KIA ta bay haya na e momentonan aki por compar’e cu nivel 3 di e opleiding cu tin na Cuerpo Policial. “No solamente e ta hisa e calidad di producto di KIA, pero e trahadonan lo ta mas miho prepara”, Rocco Tjon a remarca. Tambe esaki lo brinda e personal di KIA mas posibilidad, es decir cu si pa un motibo den futuro nan lo kier cambia di trabou, e diploma cu nan ta bay haya ta haci esaki posibel si nan kier bay den otro organisacion a base di un “individueel opleidings traject”.
Hopi hende a aplica pa por bay siña pa trahado di KIA y e proceso tabata uno largo. Manera tur organisacion tin e proceso di seleccion, proceso di carta, screening, test di sport, examen medico y hopi mas. El a dura algun luna y KIA ta kere cu ta importante pa inverti tempo den dje pasobra na final di dia e resultado final lo ta mas miho.
Korrectie Instituut Aruba, KIA a muda pa su localidad na Santo di Patia na San Nicolas dia 22 di september 1990, pues 26 aña pasa. E prizon tin un populacion di un maximo di 200 detenido, parti den detencion preventivo, seccion di hende muhe y seccion di hubentud. Na KIA tin mas o menos 180 empleado trahando 24 ora pa dia pa garantisa siguridad y atende cu e presonan den cuadro di e periodo cu nan mester sinta nan castigo cu e meta pa coregi nan erornan y sali atrobe como miho ciudadanonan pa nos pais.