Rocco Tjon: Parlamento lo aserca ARA pa investigacion Fundacion Lotto pa Deporte

Fraccion di MEP ta haya cu e actitud y falta di transparencia di FLPD ta perhudica deporte y deportistanan Arubano. Na mes momento e falta di transparencia ta obstaculisa Parlamento di haci nan trabou debidamente.

PREGUNTANAN DI FRACCION DI MEP
Durante tratamento di presupuesto Fraccion di MEP a haci diferente pregunta regardando e operacionnan diario di FLPD. Motibo di e preguntanan aki ta pa haya sa si e operacionnan diario di FLPD ta di balor agrega pa deporte y pa wak si ta necesario p aloca mas fondo pa deporte. Sinembargo FLPD a scohe pa no contesta e preguntanan aki y paga un abogado pa manda un carta pa splica cu nan no lo contesta Parlamento.

ASERCA ALGEMENE REKENKAMER
Debi na e actitud irresponsabel di FLPD y e falta di transparencia Fraccion di MEP hunto cu coalicion a scohe pa aserca ARA pa haci un investigacion riba e “doelmatigheid y rechtmatigheid” di con FLPD ta aloca fondonan di pueblo di Aruba.

BASE LEGAL PA ARA INVESTIGA FLPD
ARA, segun articulo 31 di Landsverordening Algemene Rekenkamer, tin e autoridad legal pa investiga entre otro tur fundacion cu di un manera of otro ta haya subsidio di pais Aruba of ta maneha fondonan cu nan a obtene atraves di pais Aruba. Y manera ta conoci den pasado pais Aruba a haci un fianza di 17 miyon florin pa FLPD, na bienestar di deportistanan. Segun ley e fundacionnan aki ta obliga pa copera cu cualkier peticion di ARA.

FIANSA PA FLPD DOOR DI PAIS ARUBA
E fianza menciona anteriormente tin rekisitonan mara na dje ancra den ley tambe. E rekisitonan aki FLPD no ta cumpliendo cune. Basa riba e incumplimento aki, falta di transparencia y escohencia di FLPD pa no contesta Parlamento su preguntanan ta necesario pa aserca ARA pa haci un investivacion den FLPD.

PA CONCLUI
Mañan mainta den un reunion di comishon central ta di spera cu fraccion di AVP tambe uni na e punto fiha pa coalicion y pone bienestar di deportistanan prome. Ban hunto, como Parlamento, percura pa deporte por florece y e actitud dañino di FLPD por ta pa pasado.

Fraccion di MEP ta bay aserca den luna di februari tur organisacion deportivo y sindicato pa haya sa nan pensamento riba e actitud dañino di FLPD pa Aruba su deporte.

Comments

comments