Siman pasa na momento cu un periodista, riba plataforma internacional, a conta di ta victima di persecucion politico na Aruba. Mirando e seriedad di e acusacion aki y e daño cu e por haci na pais Aruba, preguntanan por escrito a wordo manda pa Minister di Husticia. Ta importante pa internacionalmente instancianan ta na altura cu e organo Parlamento, na un forma independiente, tambe ta eherce su tarea di control.
CONTESTANAN DI MINISTER DI HUSTICIA
Ministerio Publico ta e instituto, cu na un forma independiente, ta lidera tur investigacion penal. Na diferente momento, Minister y Ministerio Publico, a desmenti tur e acusacionnan cu ta wordo haci den e articulonan cu a compaña e preguntanan por escrito. Na april 2019 Minister di Husticia a manda un carta por escrito tambe na SIP den cual ta splica amplio.
CARTA DI PROCUREUR GENERAAL 2018
Apesar cu gobierno no a wordo acerca door di Sociedad Interamericana de Prensa (SIP), na november 2018 Procureur Generaal a manda un carta pa SIP den cual nan a splica con nos sistema hudicial ta funciona y desmenti tur e acusacionnan.
REACCION MINISTERIO PUBLICO 2019
Den un carta di april 2019 Ministerio Publico ta bolbe desmenti acusacionnan haci di e periodista local pa loke ta persecucion politico. Loke ta resalta den e carta aki ta cu segun Ministerio Publico e acusacionnan haci no ta cuadra cu e resultadonan di e investigacion cu ta andando. Incluso e propio declaracion haci den e caso aki door di e sospechoso en cuestion. Ministerio Publico ta premira cu e caso aki lo ta den corte na mita di e aña aki.
PA CONCLUI
Nos por a tuma nota cu riba rednan social, lider di AVP, sr. Mike Eman, ta uza e sucedido aki pa fomenta desunion den nos pueblo. Esaki a pesar cu Procurador General a duna un splicacion amplio y desmenti e acusacionnan haci a base di e resultado di investigacion incluso e propio declaracion di e sospechoso.
Ta spera cu Sr. Mike Eman sa di respeta un instituto manera Ministerio Publico y no causa daño na nos pais door di skirbi cosnan sin base na Ingles riba rednan social.