Rocco Tjon (MEP): Hulanda ta di acuerdo pa incorpora Aruba den programa di ayudo di Union Europeo

REUNION CU MINISTER STEF BLOK
Diahuebs 7 di maart e delegacion Arubano di Parlamento tabatin un reunion cu Minister di Asuntonan Exterior di Hulanda, Sr. Stef Blok. Durante e reunion aki Sr. Blok a duna di conoce cu e ta bay di acuerdo pa Aruba por wordo incorpora den e programa di Union Europeo pa cu ayudo pa e problematica di refugiado for di Venezuela. Obviamente Hulanda kier tuma nota di e plan di crisis pa atende cu e situacion aki.

E programa aki ta ofrece entre otro sosten financiero na paisnan cu ta enfrenta problemanan debi na e crisis di refugiadonan for di Venezuela. Hulanda a priminti Aruba te cu aworaki solamente asistencia tecnico pa cu refugio di personanan cu ta bin for di Venezuela y tambe e procedura cu esaki ta bin cune. E crisis di refugiado aki ta costa Aruba hopi placa y p’esey Presidente di Parlamento di Aruba, conhuntamente cu Presidente di Parlamento di Corsow, a sinti e necesidad pa pidi ayudo na Union Europeo.

REUNION NA BRUSELAS
Dialuna 11 di maart e delegacion di Aruba lo ta na Bruselas pa reuni cu Embahada Hulandes, e Comision Europeo y tambe cu European External Action Service (EEAS) cu ta sostene paisnan cu problematica di refugiado.

PA CONCLUI
E reunion cu sr. Blok a bay sumamente bon y un di e rekisitonan pa por wordo incorpora den e programa di ayudo a wordo cumpli cune. Hulanda a duna acuerdo pa Aruba por wordo incorpora, pero obviamente sr. Blok a duna di conoce cu Hulanda kier tuma nota di e plan di crisis pa atende cu e problematica aki tambe a corto plazo.

Comments

comments