Rocco Tjon: Durante reunion di Comishon Central unanimamente a instala comishon pa asuntonan di Merca

Aña pasa Parlamento di Aruba a ricibi bishita di Congreso Mericano y a reuni cu nan riba diferente topiconan relevante pa Aruba. Despues di esaki a sigui explora e balor agrega cu un relacion structural cu Merca a base di Parlamento por tin pa Aruba. Awe durante un reunion di Comishon Central unanimamente Parlamento a instale e comishon nobo cual ta “Vaste Commissie Noord-Amerikaanse aangelegenheden”.

RELACION CU MERCA
Manera ta conoci Aruba ta traha hunto cu Merca riba diferente tereno manera turismo, aviacion, economia y husticia djis pa menciona algun. Riba diferente di e terenonan menciona ya caba ta existi diferente “Memorandums of Understanding”. Mirando e importancia di e relacion aki ta importante pa for di e plataforma di Parlamento fortifica e relacion cu Congreso Mericano. Den combersacion cu Minister plenipotenciario, sra.Mr. Joselin Croes e tambe a señala e balor agrega di fortifica e relacion pa asina capitalisa riba e “low hanging fruits”.

TRIPARTITE OVERLEG
Ta na Augustus 2019 cu e Parlamentonan di Corsow, Sint Maarten y Aruba a trata e topico aki tambe. Tur tres pais ya caba tin lazonan fuerte cu Merca riba tereno di Turismo, Seguridad y Economia. Mirando e desaroyo pa loke ta finanzas publico ta importante pa enfoca tambe riba e topico aki. Parlamento di Corsow a reuni cu miembronan di congreso Mericano. E interes pa tin lazo mas fuerte no ta biba solamente cerca e Parlamentonan Caribense, pero esaki tambe a wordo vocifera door di “congressional Staffers” cu a bishita Aruba.

PA CONCLUI
Pa Aruba esaki sigur ta importante mirando cu nos ecomomia y turismo ta depende grandemente di Merca. Pa concretisa e relacion entre e islanan y Merca e Parlamentonan lo tene contacto cu consulado Mericano, congreso Mericano y e Ministernan plenipotenciario cu ta representa e islanan na Merca.

Comments

comments