Rocco Tjon: Cifra di Directie Financiën ta prueba cu gasto bou Gabinete Wever-Croes a baha astronomico

Recien nos por tuma nota di un articulo caminda ta insinua cu Gabinete Wever-Croes ta previligia cierto bufetenan di abogado. Na mes momento tambe por wak cu ta opositornan ta manipula pueblo door di bisa cu gastonan na e bureaunan di Minister a aumenta. Sin bay bek den pasado y mustra con Mike Eman tawata malgasta placa di pueblo, nos ta bay refuta un biaha mas den e articulo aki, atraves di cifranan di Directie Financiën, e manipulacion di AVP.

COMPARACION DI GASTONAN NA BUREAU MINISTERNAN

Atraves di e cifranan di Directie Financiën publica hunto cu e articulo aki, nos por wak exactamente kico Gabninete Eman tawata gasta na e bureaunan di Minister y kico Gabinete Wever-Croes tawata gasta. Na 2016 Mike Eman a gasta 46.9 miyon florin directamente na e bureaunan di Minister y na 2017 50.7 miyon florin. Sra. Evelyn Wever-Croes sinembargo na 2018 a gasta na e bureaunan di Minister 30.6 miyon florin. Kiermen e a reduci esaki cu 20.1 miyon florin. Esaki ta e motibo dicon nos ta tuma un postura fuerte contra Hulanda y e colegio di supervision financiero.

TRANSPARENCIA DI MANEHO DEN COMPANIANAN ESTATAL
Durante diferente reunion publico manera ora a trata RDA, prome minister Evelyn Wever-Croes, a pone tur documento y contractnan na disponibilidad di Parlamento. Tambe a contesta tur pregunta cu a wordo haci riba e topico aki. Adicional aworaki a manda un carta (MAZ/5550) pa tur companianan estatal pa wak con nan ta otorga contract y na mes momento recorda nan di e principionan di “good governance” cu e gabinete aki ta para pe.

PA CONCLUI
Deficitnan bou gabinete Mike Eman durante 2010 pa 2017 tawata varia entre 132.4 miyon florin cu un maximo di 443.3 miyon florin na 2012. Gabinete Wever-Croes, manera CAFT mes a bisa den nan carta lo cumpli cu e norma financiero di 2019, cual ta un deficit di 25 miyon florin so. Y na 2020 Aruba lo conoce un presupuesto cu un surplus di 25 miyon florin. Esaki ta e realidad di e diferencia di maneho entre Mike Eman y sra. Evelyn Wever-Croes.

Comments

comments