Rocco Tjon: Caso IBIS, un momento pa reflexiona

Manera ta conoci un ex-minister di AVP a wordo sentencia na 4 aña di prison pa entre otro soborno, malversacion y actonan coruptivo. Hues den su sentencia a splica detayadamente cu e ta haya e acusacionnan di parti Ministerio Publico prueba.

DECLARACION MIKE EMAN CASO IBIS
Como politico hoben mi ta lamenta e declaracion di ex prome Minister. Di un banda e ta bagatalisa e caso door di pint’e como si fuera cu e ta normal. Di otro banda ta trata na culpa instancianan manera Ministerio Publico.

E declaracion y actitud di Mike Eman ta carece di liderazgo y falta di sentido di responsabilidad. Mesun falta di liderazgo nos a ripara na:
-2014 ora Mike Eman a haya un KB di Hulanda pa “ondeugdelijk bestuur”.
-2015 ora Mike Eman a scoge pa laga su secretaria papia cu e ex-minister y no e mes.
-2017 ora a scoge pa wanta un conferencia di prensa extra-ordinario pa anuncia hayasgo di gas despues cu e ex-minister a keda deteni. Esaki pa desvia atencion, paso te dia di awe no a haya gas.
– na 2018 ora a fabrica cifranan di Centrale Bank y malusa e logo di Centrale Bank.

LEYNAN PA PROMOVE INTEGRIDAD
Sr. Mike Eman tawatin 8 aña di tempo pa reglamenta aspectonan di financiamento di partidonan politico. Pero el a scoge pa no atende cu esaki, pasobra realidad ta cu esaki lo a stroba e campaña ultra costoso di AVP.

Den apenas algun luna cu Parlamento 10 a asumi nan responsabilidad e concepto di ley pa reglamenta esaki a wordo atendi cun’e, door di mi colega Edgard Vrolijk y mi mes persona. Edgard Vrolijk, e motor tras di e ley aki, ta trahando riba e “nader rapport” pa asina e por wordo trata dentro di poco.

PA CONCLUI
Bon gobernacion ta rekeri colaboracion di tur hende den comunidad. E ta un “wisselwerking” entre ciudadanonan, departamentonan gubernamental, gobierno y sector priva. Nos tur mester asumi nos responsabilidad y no simplemente culpa full mundo manera Sr. Mike Eman a bin ta haci.

Comments

comments