Siman pasa nos a tuma nota di e anuncio di Prome Minister mr. sra. Evelyn Wever-Croes caminda splica cu negosacionnan cu Hulanda ta terminando. Tin 4 cambio importante compara cu e acuerdo inicial cu a wordo propone na Aruba.
ARTICULO 4 LEY DI REINO
Manera ta conoci Gabinete Wever-Croes ta negociando contenido di e Ley di Reino cu Hulanda. Un cambio cardinal cu ta bay wordo presenta ta un articulo 4, completamente nobo. Den e articulo aki explicitamente lo ancra e autoridad autonomo di pais Aruba. Di e forma aki e autonomia no ta wordo respeta solamente a base di palabracion y cierto frasenan den e “memorie van toelichting” di e ley.
LANDSPAKKET DEN UN ONDERLINGE REGELING
E “landspakket” den cual tur e puntonan di palabracion riba diferente aspecto ta wordo haci, no lo forma parti mas di e Ley di Reino. Aworaki esaki lo wordo ancra den un “onderlinge regeling”. Nos a trece hopi biaha pa dilanti cu Aruba tambe kier pa cierto cambionan wordo efectua, esaki mirando cu hopi di e puntonan ta forma parti di e “masterplan” cu Gobierno a presenta na Parlamento. E unico punto di preocupacion tawata e base huridico. Pues e cambio aki ta trece cune un otro base huridico y nos ta considera esaki un paso significante
SOSTEN DI LIKIDEZ
Pa loke ta e sosten di likidez necesario pa Aruba por cumpli cu su debernan tawata tin un impase. Esaki a conduci cu Aruba a hay’e obliga pa fia placa riba mercado laboral. Despues di un ehersicio di parti di Hulanda nan a conclui cu e proyeccion cu Aruba a haci tawata corecto. Pues a logra yega na otro riba e punto aki tambe, caminda lo brinda e ayudo di sosten di likidez necesario te cu fin di aña.
PA CONCLUI
E siman aki Gabinete Wever-Croes lo ricibi e texto definitivo pa asina e por wordo studia. Parlamento tambe lo studia e cambionan aki unabes nan wordo comparti, pa asina Parlamento tambe por fiha nan posicion.