Partido AVP a presenta su plan pa cu e maneho di husticia, prevencion di criminalidad y siguridad di Aruba en general y candidato number 7, Robert Candelaria, tambe a enfoca riba e areanan aki. Den e ultimo 4 añanan por mira cu Aruba ta mas sigur den region di Caribe. Aruba ta bezig ta score den e parti di criminalidad ora mira cifranan. Loke cu kier enfatisa pe añanan cu ta bin, ta pa traha riba e parti “con sigur cada ciudadano ta sinti nan mes”.
Tur loke e partido di AVP a bin cun’e riba e area di prevencion, riba e maneho, mas agente polis nobo, tur esaki ta pa aumenta e sentimento di siguridad di cada ciudadano di Aruba. Esey lo ta e linea cu nan lo bay haci riba e area di siguridad. Robert Candelaria a duna di conoce cu prevencion ta hopi amplio y no por mira e fruto di biaha, pero cada un di nos sa cu ora di implementa prevencion na e manera corecto, e lo bay ta na beneficionan di cada un di nos.
E enfoke cu nan kier tin ta riba e hobennan di scol, pasobra for di scol por señala cua ta esunnan cu ta core e riesgo di cay den cosnan robes. Desde e fase trempan den nan bida, e hobennan por haya un guia di un maatschappelijk werkers di fundacionnan. Ta hibando combersacionnan cu fundacionnan pa mira con nan por hunga un rol activo den esaki, pa preveni cu e hobennan aki ta cay mas leu den criminalidad. Tambe pa yuda nan y nan mayor pa haya e bon caminda bek.
Tin diferente fundacion cu tin programanan cla y ta cla pa traha hunto cu e Ministerio di Husticia, pa asina por implementa esaki pa asina tin un Aruba mas sigur. Tambe ta papiando cu iglesianan y tur organisacion cu ta hunga un rol den esaki, pa asina no tarda pero takel na tempo, interveni na tempo pa por pone nan bek riba e caminda corecto. E parti di tecnologia tambe ta importante unda cu kier sigui haci mas inversion den dje. “Pa por tin mas agente policial ta uno, pero ora por ekipa nan cu loke nan tin mester pa asina nan por traha mas miho, gana so nos por gana”, el a duna di conoce. Kier bin cu apps manera di neighborhood watch, unda cu e ciudadanonan, e hendenan di bario ta bira horea y wowo di otro, ta comparti informacionnan cu otro y cu Cuerpo Policial.
“Nos kier traha cu drones”, el a remarca. Esaki ta pa cu un fraccion di e costo por logra mira hopi mas y pa haci trabounan preventivo. Tur esaki na mesun momento di cobertura, di ora completo na fraccion di prijs. Tin diferente cos cu por haci cu tecnologia, pero un cos cu ta importante pa nan ta cu cierto servicio di gobierno ta trahando hunto nan y kier sigui aumenta.
Duana, Kustwacht, Inmigracion, Cuerpo Policial ta trahando mas cerca cu otro. Esaki ta pone cu e frontera di Aruba ta keda bira mas sigur cada dia. Tambe lo percura no solamente pa e hendenan cu ta drenta, pero arma y droga cu ta keda busca maneranan pa keda drenta cu radar, cu tecnologia pero tambe trahando hunto y no como islanan los y riba nan mes. Tur esaki ta loke e nan kier sigui traha riba dje, enfoca riba dje, cual ta plannan existente cu ta den implementacion. Pa asina mira e plannan aki realisa y hunto por gosa di esaki.