Robert Candelaria (AVP): Innovacion den e sector di siguridad a haci Aruba un isla mas safe

Un grupo di profesionalnan local y di nos region a bini hunto pa e lansamento di un capitulo di ASIS pa islanan den Caribe Hulandes. Awor Aruba tambe tin su propio chapter di e organisacion di security ASIS international. Parlamentario di Fraccion di AVP, Robert Candelaria, tabata keynote speaker na e lansamento di e chapter aki, despues di a haci esaki na Corsou tambe fin di aña pasa. Loke Candelaria a remarca ta cu el a gusta e input di cada compania y cada persona durante e reunion aki. Por a mira cu e conocemento y profesionalismo t’ey y e deseo t’ey pa traha den e mesun direccion pa eleva nos nivel y calidad di seguridad na Aruba. Na varios ocasion el a expresa cu lo inicia un proyecto di ley cu tin di regla aspectonan basico pa e sector di siguridad.

E ley lo mester stipula, entre otro e exigencianan pa un compania di siguridad por wordo estableci. Tambe mester regla e aspecto di educacion di trahadonan den e siguridad pa asina sigui eleva e nivel y calidad di e sector. Asina tin diferente componente mas di e sector cu lo wordo regla den e ley aki. Na momento cu haci tur esaki lo tin un calidad di siguridad hopi mas halto, aunke cu hopi lo puntra dicon esey ta importante pa Aruba. E Parlamentario a expresa cu e ta na bienestar di Aruba en general y biniendo cu esaki lo trece e mundo di siguridad y husticia di Aruba mas cerca di otro. Siguridad y husticia trahando mas cu otro lo facilita intercambio di informacion y alabes lo percura pa tin hopi mas wowo, hopi mas horea, hopi mas mente trahando hunto riba e siguridad di nos pais.
Parlamentario Candelaria ta kere cu un elemento importante tambe pa por traha hunto den siguridad ta e elemento di confiansa entre e partnernan di sector priva y publico. Si no tin confiansa, no lo comparti informacion nunca.

Aworaki tin hopi componente manera islanan riba nan mes, trahando banda di otro cu no tin contacto cu otro den e sector priva y publico cu mester percura pa nos siguridad. E Parlamentario ta kere cu nan mester organisa e colaboracion entre instancianan haciendo uzo di regla y structura. Di e forma ey lo por traha den un forma hopi mas eficiente pa por eleva e nivel di siguridad di nos isla.

Invitadonan a presenta y participa activamente den e encuentro aki. Cu participacion y input di esunnan presente, por a experencia un sentimento di positivismo y speransa pa futuro di siguridad pa nos pais. E proposito awor ta pa logra haya mas sectornan su representacion den e chapter. “Bo mester kier participacion di profesionalnan activo den e mundo di siguridad di diferente sector, pero tur cu mesun proposito, esta pa un Aruba mas safe y un Aruba mas sigur. Asina tur profesional por contribui na e siguridad di nos isla intercambiando experencia, informacion y ideanan”, Parlamentario Candelaria a expresa.

No mester lubida cu Aruba ta un isla cu ta depende hopi di turismo y esey ta nifica cu hopi compania y hopi profesional a haya nan ta profundisa nan mes den e materia di crece den conocemento y experencia. Esey ta duna aki un bentaha y por traha riba un producto cu ta desaroyando caba pa hib’e na e nivel cu kier yega cun’e. Asina aki lo percura pa mara loke ta necesario den ley.

Durante e reunion aki diferente persona a trece ideanan y experencianan hopi balioso padilanti. Un ehempel di esaki ta, kiko ta e criterianan pa por comparti informacion cu otro departamento y con pa crea e condicion optimal pa yega na un base solido di confiansa. Si no tin consecuencia pa ora algo bay robes den compartimento di informacion, naturalmente ningun partner lo no kier comparti informacion cu otro. Ora cu ta subi e nivel, subi e expectativa di partnernan y tene otro responsabel, ta mira cu esey ta un base -un fundeshi- pa confiansa pa asina por comparti informacion cu otro.

E chapter kier reuni cada pasa 2 luna, pues un total di 6 reunion pa aña. Tambe ta acercando diferente orador pa e reunionnan aki pa asina sigura cu lo bay tin hopi bon calidad di informacion treci padilanti e aña aki. E Parlamentario kier traha hunto cu ASIS riba aspecto legal di seguridad na un proposicion di ley. E idea ta pa hasi esaki conhuntamente cu hermana isla Corsou pa eleva e calidad di seguridad, no solamente na nos isla, pero tambe den nos region.

Comments

comments