Rino Hermans: Temporada di horcan a cuminsa for di mei caba

Oficialmente temporada di horcan a cuminsa dia prome di juni. Sin embargo for di dia 15 mei ultimo ya caba a dal e prome advertencia di un tormenta tropical. Esaki ta sigui e patronchi di e ultimo añanan, segun Rino Hermans di Bureau Rampenbestrijding.

Pa di shete aña consecutivo a experencia un tormenta tropical cu a cuminsa prome cu e temporada, esta dia 22 di mei ora cu Ana a surgi.

Den e preparacionnan cu a haci, a cuminsa cu scolnan y pronto e plan di calamidad ta cla, pa sigui cu departamentonan publico. Hurricane Center a pidi tur pais pa nan ta cla cu nan preparacion y training ora cu e temporada ta den su pik, esta den lunanan di augustus pa september.

Aña pas ano a bay scolnan door di pandemia, pero den 2021 a cuminsa for di februari traha cu e scolnan. Departamentonan di Gobierno for di mei a cuminsa cu e plan. Mayoria di departamento tin nan plannan revisa, door di e pandemia mes.

Cu e sector HORECA tambe nan ta den combersacion, principalmente debi cu nan ta e area cu ta bay bou di awa ora di hopi yobida. AHATA ta guia e plan di sector HORECA. Nan ta bay tin un sesion pa nan partnernan di dos dia y 16 ora pa revisa henter e plan. Ya caba a haci un “intake” y awo ta bay pa update henter e plan. E sesion lo tuma luga na Marriott. E enfoke ta pa recupera mas lihe posibel ora cu e tempo afecta Aruba.

Segun e pronostico haci, e temporada lo produci 16 pa 20 fenomeno natural, di cual 9 lo bira horcan y 5 cinco lo ta horcan grandi. “Nos ta spera cu e pelea di El Niño y La Niña  den Atlantico ta wanta nos sigur manera aña pasa. Den 2020 tabatin 30 sistema di cual 3 a pasa cerca di nos. Ban spera cu e aña’ki nos tin suerte cu e lo keda asina,” Hermans a bisa.

E departamentonan di gobierno ta drechando tur area unda ta necesario y na september lo bay den un training.

Comments

comments