Quota International, Inc. ta cumpli su 101 aniversario, ta pa e motibo aki Rina Gonzalez ta felicita tanto e club di Aruba como tur club rond di mundo di Quota y ta desea e organizacion internacional di servicio na e comunidad aki hopi exito. E miembronan rond di mundo ta boga pa necesidadnan basico di hende muhe, mucha, esnan sordo, mudo y esnan menos afortuna.
Tur projecto di Quota International ta alinea cu organizacionnan manera Nacionnan Uni y e metanan di desaroyo sostenibel. Specificamente e clubnan di Quota ta traha riba metanan 1 y 3: pa caba cu pobreza y hamber y pa promove igualdad di genero y empodera nos hende muhenan, respectivamente.
E organisacion a keda funda na Buffalo, New York na 1919 door di Wanda Frey Joiner, como un club di servicio pa hende muhe similar na esnan popular di hende homber.
Awendia e organisacion tin mas di 270 clubs den 14 paisnan rond Mundo.
E nomber Quota ta nifica “Un parti di e total”, un nomber cortico cu ta fasil pa corda cu ta refleha e metanan y valornan di e club. Prome a yam’e, Quota Club International, Inc., pero despues di aña 1961 a bira simplemente Quota International, Inc.
E slogan di Quota International, Inc. ta “Nos ta Comparti”. E fundadornan a spera di hunto, comparti nan talento y abilidadnan pa yuda hende den necesidad. E miembronan rond mundo ta continua di tene e mesun filosofia vigente door di recauda fondo pa yuda den comunidad, desaroya cooperacion duradero na mes momento promove comprension internacional.
Rina ta felicita e club di Aruba y tambe tur otro clubnan internacionalmente y ta desea nan hopi aña mas desplegando bon obranan pa e comunidadnan rond mundo.
Riba e potret: Rina Gonzalez, di Aruba Vicepresidente di Quota International Inc. hunto cu e presidente Internacional actual procedente di Manila, Filipinas, Emilie Simon.