“Oportunidadnan den bida ta presenta sin spera, y tin ora mester gara nan cu dos man!”
Pa medio di un comunicado ricibi di parti di Drs. Roderick ‘Ricky’ Hoek, e ta comunica cu, despues di 10 aña y mei como director di Asociacion Trabao di Hubentud na Aruba (ATHA) oficialmente su ultimo dia di trabao lo ta dia 31 di december 2017. Pero teniendo na cuenta dianan di vacantie y dianan di fiesta, su ultimo dia na oficina lo ta diabierna 15 di december 2017.
Entrante 1 di januari 2018, Sr. Hoek lo cuminsa carera nobo na Universidad di Aruba como e ‘Professional and Science Practice Coordinator’, cual funcion ta encera docente y stage-cooridinator pa e estudio di Bachelor Social Work & Development. E ta sigui bisa cu aunke cu e ta bay for di ATHA, e lo sigui traha pa e comunidad for di funcion nobo na crea oportunidadnan pa studiantenan den tereno social. Lo por keda den contacto via di telefon di universidad cu ta 528 22 00. ATHA ta canando e proceso di solicitud y pronto su sucesor(a) lo t’ey pa sigui brinda e mesun servicio cu ATHA a sa di haci den e ultimo 31 añanan.
Por ultimo, Sr. Ricky Hoek kier a gradici di curason TUR persona cu durante 10 aña y mei cu a traha hunto cun’e di un forma of otro na mehoracion di nos funcionamento, desaroyo di organisacionnan, crecemento personal y profesional, y mas cu tur cos na e bienestar di nos mucha- y hobennan na Aruba.