ATHA a lansa e proyecto oficialmente di carchinan di pasco, caminda cu ATHA un biaha mas, pa di 30 aña oficialmente, a wordo lansa. A haci e prome entrega na gobernadora interino di Aruba, Ella Tromp-Yarzagaray, caminda cu e scolnan ganado tambe a bin y a haci’e den e bunita localidad di museo historico di Aruba.
Diseño
Hoek a sigui splica cu e diseñonan ta di e pintor Elvis Tromp, caminda cu el a pinta bunita diseñonan di pasco, paisahenan di Aruba, cu e toke di pasco riba dje y na banda tambe, e detaye cu el a pone, ta e parti di e flornan cu ta haya riba e casnan di antaño cu ta dun’e un toke cultural, pero un toke netamente di Aruba y e carchinan di monumentonan di Aruba, caminda cu el a pone bunita monumentonan, unda cu ta mira por ehempel Fort Zoutman, Gabinete di Gobernador, Watertoren di San Nicolas, Kerki Protestant nobo y bieu y Bernhardstraat di San Nicolas, tambe cu ta un parti bunita, cu ora cu ta bin di Colony, ta drenta den e caya di San Nicolas, ta mira na man robes e watertoren y na man drechi misa Santa Theresita, cu ta duna un impresion hopi bunita di loke ta nos arkitectura local.
Banda di dje, tin un tas di supermercado, cual no ta algo di pasco cual no ta un custumber di haci, pero un tas pa supermercado, pasobra mirando cu dia 1 di Januari 2017 tasnan di plastick no ta wordo acepta mas den supermercado, kier yuda e muchanan pa ta conciente pa cuida nos medio ambiente. No solamente muchanan, pero adultonan tambe por cumpra e tasnan aki tambe, cu un diseño grafico local, caminda cu a pinta un bunita diseño di un mucha ta hunga. Na un banda tin un mucha muhe y otro banda pa un mucha homber. Asina tambe traha riba concientisacion pa cuida nos medio ambiente pa nos monumento y paisahenan. Tur e combinacionnan aki, ta duna e proyecto aki un link cu otro.
Manera semper scolnan basico y algun scol secundario ta yuda den e proyecto aki door di pasa cerca famia, bisiña y companianan pa nan bende, pero e yamada ta bay pa e companianan y individualnan cu ta pafo, cu kier aporta cu ATHA, pasobra finalmente loke ta recauda ta pa inverti den hubentud di Aruba, den proyectonan cu ta haci. No solamente ATHA, sino su 50 miembronan cu ta riba e isla, cu ta haci proyecto y actividadnan pa mucha y hoben, cu ta inverti bek den nan y asina cada un por pone su granito di arena y recauda fondo y yuda na un miho futuro pa e hubentud di Aruba.
Meta
E meta cu tin tur aña ta 100 mil florin. E ta un suma grandi, pero toch hopi facil pa yega. ATHA tin un formula caminda cu muchanan di scolnan secundario participa y nan bende por lo menos 5 producto, por ehempel dos set di carchi di pasco, etc., por cera 50 florin caba, pasobra tur producto ta 10 florin. Un set di carchi di pasco ta 10 florin, un set di carchi di Aruba ta 10 florin y un tas ta 10 florin y si tur mucha bende entre 3 pa 5 producto of companianan cumpra e mesun cantidad of mas, lo yega e suma di 100 mil florin cu nan kier recauda.
Dia di cuminsa bende
E benta a cuminsa caba. Manera cu a lansa e proyecto oficial cerca gobernador di Aruba, e scolnan a ricibi e envelopnan caba y nan por cuminsa bende te cu fin di October.