MFA Noord, ta un facilidad espacioso, placentero y moderno cu ta ofrece un variedad amplio di servicionan na pueblo di Noord y bisindario. E servicionan hulpbestuurskantoor (HBK) ta un parti importante di e totalidad di servicionan na MFA Noord. E edificio anterior no ta comparabel na loke tin awor aki y esaki ta haci cu hopi cliente ta sintinan hopi confortabel. Esey ta haci tambe cu hopi mas hende ta haci uzo di e servicionan di e hulpbestuurskantoor cu loke tabata custumbra tempo cu nan tabata ubica den e edificio bieu na Palm Beach.
Edificionan Multifuncional ta parti di un vision total di Gabinete Mike Eman y particularmente Prome Minister Mike Eman. E meta ta pa hiba diferente servicio importante di departamento y instancianan di Gobierno mas cerca di pueblo y na mes momento crea un ambiente mas social mas comfortabel. E pensamento inicial tabata pa construi cinco edificio multifuncional, na Noord, Paradera, Sta. Cruz, Savaneta y San Nicolas. Na e momentonan aki ta trahando duro pa traha uno tambe na Dakota.
Na MFA Noord a keda constata cu e demanda pa e servicionan cu ta wordo brinda a aumenta. “Nos tabata na altura di e cifranan di HBK Noord, cu ta clientenan fiho cu ta bin tur fin di luna paga nan cuentanan, pero tambe tabatin esnan cu ta pasa busca papel di 5 florin. Pago di cuenta di utilidadnan ta algo cu ta ripiti tur luna y e cantidad di clientenan cu ta haci uzo di e servicio aki ta hopi halto,” Richard Tromp manager di MFA Noord a splica. Sinembargo awor cu tin un aña den operacion, e expectativa a wordo surpasa. Tin un gran parti di e forsa laboral ta traha den area di hotel y esaki ta nifica cu pa tur esnan cu ta baha di pariba, MFA Noord ta e ultimo punto cu nan por haci uzo di dje pa haci nan pagonan di utilidad, servicio di AZV, SIAD y Laboratorio. “Door cu nos tin basta facilidad aki den, espacio ta grandi, y parkeo ta hopi mas facil, a contribui cu e cantidad di personanan cu ta bin MFA Noord a aumenta.”
Uzo di MFA Noord ta mas eficiente principalmente pa esnan cu mester haci uzo di servicio di AZV, departamento di impuesto of mester haci test di laboratorio. Tur esakinan tin den Edificio MFA Noord. “Bo ta tende hopi hende ta bisa ‘esaki ta nifica cu mi no mester bay na diferente departamento mas. Mi ta bin na un solo luga y mi por haya tur mi servicionan.’ Nan ta haya varios servicio bou di un solo dak. Esey ta hopi bon pa nos clientenan.”
MFA Noord ta un diseño hopi moderno, cu panelnan solar pa e edificio mes abastece su mes cu e coriente necesario, pero e clientenan tambe por disfruta di WiFi gratis. Tin areanan unda e clientenan por sinta un rato, wardando riba e servicio, lesando buki of por sinta den e cafetaria bebe y come algo. Ta pa prome biaha na Aruba cu a traha un edificio asina moderno, unda cu e cliente por sinti su mes un confortabel. Ademas, di e servicionan cu ta wordo brinda, tin areanan cu por wordo uza door di organisacionnan pa tene nan evento of reunionnan. Pa mas informacion riba esaki, por tuma contacto cu Richard Tromp, manager di MFA Noord.
Na e momentonan aki MFA Savaneta ta den fase di construccion y a recientemente a yega ringbalk. MFA Paradera su fase di construccion a keda completa y e siman aki ainda ta entrega yabi di e edificio pa asina e.o. hulpbestuurskantoor di Paradera por cuminsa muda pa nan espacio nobo. Destaho publico pa construccion di MFA Sta. Cruz ta tuma luga den luna di October.