E reunion di Membrecia di Red Democratico (Algemene Ledenvergadering) a tuma luga dia 2 di juli 2017 na ATIA Building for di 13.00 te cu 17.00. Despues cu directiva, cu aprobacion di consehero, a presenta Sr. Ricardo Croes como e lijsttrekker nobo di e lista electoral 2017, e publico presente, den forma abrumador a aproba esaki. Den un “Bijzondere ALV”, cu lo tuma luga dia 30 di Juli proximo lo aproba e lista completo, cu secuencia di e candidatonan riba e lista. Aunke cu nos sa cu pa ReD for di su inicio no ta conta ki number bo tin riba lista, sino ta cantidad di voto di cada candidato ta determinante ken ta drenta Parlamento, den caso cu haya asiento(nan).
A presenta tambe e programa di ReD 2017, cu ya ta disponibel online via nos FB page Red Democratico. E meta final ta pa logra bon gobernacion (goed bestuur, good governance) y e miho medio pa logra esaki na e momentonan aki ta via un zakenkabinet, idea cu a risibi apoyo di e membronan y simpatizantenan di ReD. A informa e miembronan cu tur e esfuerzo pa yega na un lista combina un bez mas no a duna fruto, y nos kier gradici e ciudadanonan, cu no ta afilia na ningun partido, y a fungi como persona di contacto neutral entre e diferente partidonan y nan unico interes tabata e interes general. Nan intencion tabata genuino a pesar cu no a logra pa combina lista.
E energia den e sala yen tabata uno sumamente positivo y tur skina ta tende cu ReD ta e speranza pa e cambio. E presentacion di e candidatonan ta mustra cu ReD a pasa den “verjongingsproces”, ya cu e mayoria presente tabata representa e generacionnan mas jong. Tin speranza pa ReD, tin speranza pa Aruba, esei tabata e ambiente di e reunion di diadomingo cu a pasa. Nos kier gradisi e presidente di directiva di ReD, ir. Robby Croes, pa tur su trabao cu a hiba na un reunion exitoso di ALV bao di su liderazgo.
Tambe ReD ta presenta un candidato nobo den persona di dokter Nuris Lampe, kende a studia medicina na Venezuela y Mexico y a specializa den dermatologia. E tabata pa hopi tempo presidente di e asociacion di specialistanan di Aruba. Tambe e ta activo riba tereno di pintura artistico. Ta trata di un profesional excelente cu ta cla pa sirbi nos pueblo via politica cu ta e vocacion di mas noble cu tin. Dokter Nuris Lampe ta enriquece e famia di ReD. Bonbini y danki!