Diabierna pasa sr. Ricardo Croes a subi Hooiberg 21 biaha pa recauda fondo pa Casa Cuna y Pasa dia Briyo di Solo. El a cuminsa 4 PM or y a keda cla un tiki despues di 10 PM. Despues di a logra su meta sr. Ricardo a entrega e caha di donacion pa Pasadia Briyo di Solo na e directora di Stichting voor Verstandelijk Gehandicapten (SVGA).
Dialuna, dia 11 di September sr. Ricardo Croes mes a habri e caha cu donacion pa Pasadia Briyo di Solo den compania di Jeta Figaroa, cabesante di Briyo di Solo, Dennis Conradus, administrador di SVGA y e directora di SVGA, Els van Homelen. Hunto a conta e placa cu tabata den e caha.
SVGA ta hopi contento di por anuncia cu sr. Ricardo a recauda e suma di 3433,20 florin total. SVGA en general y Pasadia Briyo di Solo en particular ta gradici sr. Ricardo Croes pa e bunita iniciativa pa yuda cu reconstruccion di e pasadia despues di e candela di dia 17 di Augustus. SVGA ta gradici inmensamente tur persona cu a aporta cu un donacion den e box pa Pasadia Briyo di Solo. Ta hopi great pa sinti e calor humano di e comunidad cu semper ta cla pa yuda otro cu ta den nesecidad!