Ta di lamenta cu den tur 3 PPP cu a wak (Hospital, Watty Vos Blvd y Green Corridor), ta papiando di 1 biyon florin cu mester bay paga pa e proyectonan aki. Y e Gobierno cu a implementanan no a paga ni 1 florin di ningun di e proyectonan aki. E Aña aki y otro aña lo mester cuminsa paga un suma substancial di mas o menos 80 miyon florin pa aña pa e proximo 20 – 25 añanan, sin cu a prepara presupuesto p’e.
Gobierno actual ta haye confronta cu e hecho cu dentro di e normanan di CAFT y cu ta palabra, ta haya un buraco di 80 miyon florin cu mester atende cu ne. Bo no por pone como debe/ deficit, mester wak pa reduci gasto y busca entrada extra pa por paga pa e proyectonan aki cu a crea den pasado, minister encarga cu Infrastructura Otmar Oduber a splica.
‘Goberna cu placa di otro ta facil, cual ta loke a tuma luga cu e proyectonan aki. A goberna sin cu e responsabilidad wordo carga pa esunnan cu a firma pa e contractnan PPP aki. Ta awo e Gobierno actual mester carga e responsabilidad y pueblo e consecuencianan.’
Segun Minister Oduber, loke cu ta haci diferente na e momentonan aki, ta percura\ cu trabou ta sigui. Ta drechando camindanan y barionan cu hopi añanan ta sin haya asfalt, sin crea debe y sin pospone pago pa futuro. Al contrario, a pone e suma di 9 miyon florin disponibel den presupuesto pa atende cu drecha careteranan y yuda pa 70% barionan cu nunca tabatin asfalt y cu a sufri cu e stof durante tur e añanan aki. 30% ta bay pa drecha camindanan existente cu ta den mal estado y cu pa hopi aña no a drecha.
Minister Oduber ta sigui splica cu den tratamento di presupuesto di Parlamento na december, lo haci esaki e punto principal di e discusion. A elimina e ‘wegen-infrastructuur fonds’ cu tabata e fondo encarga pa drecha camindanan den barionan den nos comunidad. Consecuentemente e infrastructura di camindanan rond Aruba cu ta di santo y esunnan principal tur rond Aruba ta den sumamante mal estado, cu scheur y buraco grandi. Cual ta un tarea cu tincu bay discuti cu Parlamento, pa mira con ta crea un fondo cu nos por carga den e momentonan financiero dificil aki, Minister a conclui.