Departamento di Cultura tambe kier pidi pueblo pa ora di bay kima sigui e tradicion di antes, dus no bay kima cualkier sushi pa asina nos no daña no medio ambiente segun Sr. Stanley Dabian.
Dia di San Juan ta un celebracion di cosecha, e baile di gai, pero tambe tin e parti di kimamento di sushi, cu ta un parti simbolico, unda ta celebra un cosecha cu a caba di pasa. Sea ta cosecha bon of cosecha malo, ta kima troncon di mata, y ta prepara e tera pa siguiente plantamento.
Pero den e caso aki, Departamento di Cultra y Cuerpo di Bombero ta haci un yamado na e pueblo di Aruba, cu e cendemento di candela ta prohibi pa ley. Den e tradcion aki, ta e unico momento cu Aruba ta haya hopi candela, tur rond. Pero dentro di e celebracion aki, na tur esunnan cu ta kima, pa tene cuenta pa haci esaki cu responsabilidad, pa no tira cosnan toxico den e candela aki. No haci un candela sin un bon supervision. No haci esaki, den un forma cu, e por perhudica bisiñanan, sea cu tin baby, of hende grandi cu ta biba cerca di bo. No pone cosnan toxico, pasobra e huma no ta bon pa ningun hende.
E celebracion aki mester keda un celebracion, algo tipico, tradicional di nos. Pero nos mester haci’e hopi bon, pa asina e gai cora no canta tampoco den bo cas, den bo cura, unda bomberonan di Aruba mester bin. Of bo ta sufri un daño, of e bisiña.
Esaki mester wordo celebra den bon firma. Y laga e parti di candela, na tur instancianan cu ta organisa actividad, cu ta haci esaki na manera responsabel. Bay wak e actividad, bay wak con nan ta haci esaki.
Ban celebra Dia di San Juan, den un forma consciente. Bishita tur e actividadnan den bo bario, pa asina nos mester bisa “Biba San Juan”, den nos comunidad, segun Sr. Stanley Dabian, di Departamento di Cultura.