IBiSA brindando e apoyo na promocion di salud pa comunidad di Aruba ta informa cu dia 29 di september tabata dia mundial di curason. Riba e dia aki rond mundo ta enfoca riba locual ta wordo yama, e ‘motor’ di nos curpa y e símbolo di nos sentimiento, cual ta e curason.
IBiSA hunto cu DVG a aserca diferente instancia den nos cominidad pa coopera y enfoca den nan propio organizacion riba e dia mundial di curason cu tin como lema e aña aki: “Di mi curason, pa bo curason, pa tur nos curason”.
Asina Aruba Airport Autority a incorpora den nan siman di “Safety & Health Week” e celebracion di e dia mundial di salud aki, pa medio di ilumina e toren di control cu e lus color cora, simbolisando e campaña di curason. Durante e mesun periode traimerdia a duna e muchanan un dibuho di ‘zentangle’ den forma di curasaon pa colora y scirbi ki compromiso nan lo hasi pa nan curason.
IBiSA a bishita diferente instancia y scolnan na Aruba cu un curasaon grandi pa invita personanan pa scirbi nan mensahe di curason riba dje pa tuma un portret di esey y comparti e mensahe via e media social di Facebook. Asina IBiSA y DVG a spera di concientisa nos comunidad riba importancia di cuida nan curason y di otro.
IBiSA y DVG ta gradici tur esnan cu directo of indirectamente a aporta na e concientisacion ariba e dia mundial di curason cu su lema ta e aña aki “Mi Curason, Bo Curason”. IBiSA ta invita comunidad pa sigui nos atrabes di nos Facebook IBiSA Aruba y pa keda pendiente di nos siguiente temanan.