E yate cu un cargamento di animal exotico bibo abordo, tambe tabata tin algun cacho, esaki ta segun vocero di Ministerio Publico, Ann Angela.
Ayera tardi laat, Veterinaire Dienst tabata tin contacto cu fiscal. E cuestion tabata bida of morto di e bestianan. Den e cargamento tabata tin bestia y parhanan exotico cu ta cay bao di e tratado di Cites, cual ta wordo proteha internacionalmente pasobra nan ta den peliger di extinsion. Tabata tin toucan, lora, macaco, dos cunaguaro, entre otro. Ta na Veterinaire Dienst mes pa splica su posicion. Fiscal a dicidi cu no ta di acuerdo cu e bestianan mester wordo poni drumi pasobra nan ta un peliger pa salubridad of cu e argumento cu nan lo mester wordo poni drumi, pa desanima hende cu ta trafica cu tipo di animalnan aki. Fiscal a dicidi cu e bestianan ta biba. Loke ta bay pasa ta, cu Veterinaire Dienst lo bay pone e tres personanan cu a trafica cu e animalnan aki responsabel pa nan cuido. E bestia y parhanan ta den cuarentena, y Veterinaire Dienst ta encarga cu nan y pa nan haya un luga. Ministerio Publico lo sigui una bes cu e Proces-verbaalnan ta cla, cu multanan cu lo core den miles y miles di florin. E pregunta pa ken e bestianan aki ta bin, ken a ordo nan. E hendenan di e yate a menciona un nomber, pero ta algo dificil pa prueba. Pues lo bay tras di e hendenan cu a wordo haya den e boto, cual ta Arubiano por cierto. Finalmente, algo cu ta hopi lamentabel ta cu ayera di e 10 toucannan cu a yega, 9 a muri y ta un so a resta y pa colmo e ta den masha mal estado y no por bisa si te asina leu e ta na bida of e ta morto. Esey ta hopi tristo y ta mustra tambe dicon e tratado internacional ta den existencia y dicon tur e esfuersonan internacionalmente y den nan pais di origen pa proteha tipo di animalnan aki, di cual a resta poco na mundo. Ta hopi condenabel cu hende ta saca nan for di nan habitat y ta distribi nan den e forma aki.