For di 9 te cu 11 di Januari 2018 ta tuma luga na Aruba, e reunionnan Interparlamenterario di Reino. Sra.Marisol Lopez- Tromp ta elabora ariba e reunionnan aki.
Den e constelacion di Parlamentarionan cu ta reuni den Reino Hulandes, den transcurso di tur e añanan, semper a bin cu proposicion pa gobierno, pa wordo haci. Un di e ehempelnan ta e geschillenregeling, cu a yega na un acuerdo cu e tempo ey a propone na gobierno.
Tin mas proposicion cu a yega di wordo treci den pasado y tambe cu a wordo cumpli, of ta den proceso pa wordo cumpli. E proposicion pa Aruba su Ombudsman, su kinderombudsman, temanan economico, etc. Den transcurso di añanan, Sra. Lopez – Tromp tambe a yega di presidi e reunion aki, e ta uno hopi importante. E accento awendia no ta manera antes mas, cu bo ta hopi den conflicto cu otro, y bringando p.e. ariba topiconan di Structura Estatal, etc. Aworaki ta den un otro periodo, unda ta focus ariba cooperacion den Reino.
Lo trata e situacion cu Venezuela, unda cu e medida tuma door di presidente Maduro, pa cera e fronteranan aereo y maritimo a keda prolonga. Fraccion di POR a pidi Minister Presidente, Sra. Evelyn Wever- Croes, si e por duna un ‘briefing’ ariba e situacion actual. Lo por tin diferente puntonan sensitivo, y Sra. Tromp ta di opinion cu Parlamento por ta bon informa, no solamente den prensa, pero tambe den Parlamento.
Parlamento tin cu haya tur informacion na un forma formal. Pero si Sra. Lopez- Tromp a bisa cu e asunto di mafia, manera cu Presidente di Venezuela a bisa, no ta e unico punto di preocupacion. Den transcurso di tempo por wak cu e fluho di personanan cu ta bin aki, cu p.e. ta hopi desespera, kier un miho bida, pero no ta documenta, tin su consecuencianan social tambe ariba comunidad. Esey ta aspecto tambe cu mester atende, no solamente e partinan economico, pero tambe consecuencianan social, e parti humano di nos hendenan. Ta aspecto cu mester trata cu seriedad. Ta puntonan cu ta toca Salubridad, Educacion, cu mester tene cuenta cun’e, si acaso e situacion bira pio, segun parlamentario pa fraccion di POR, Sra. Marisol Lopez- Tromp.